La Aprende Bisnis, Estranjeiru Domina TL

DILI – Jerasaun foun sira agora, kuandu la aprende Bisnis, maka ema estranjeru sira sei domina bisnis iha rai laran hodi hamoris sira nia ekonomia, no Timor oan kontinua sai atan ba ema lao rai sira maka moris.

Lia hirak nee hatoo husi Prezidente Partidu Frenti Mudansa Deputadu Jose Luis Guterres katak, presiza eduka ba jerasaun foun sira tanba bisnis nee diak tebes ba defende independensia nasaun nian, nee laos deit ba familia, maibe atu haree mos ba prespektiva estadu nian hodi labele fo egoismu, tanba nee jerasaun foun sira tenke aprende bisnis hodi nunee ba futuru ema rai seluk labele mai domina iha rai laran.

Jerasaun foun tenke fo tempu barak kontribuisaun ba nasaun ida nee, inklui mos jornalista sira hotu, tanba nasaun nee kontinua sei lapara, neebe ita mos presiza adapta mundu internasional, sei ita la adapta, ida nee bele perigu iha aban bainrua,” katak Lugu ba jornalista Jornalista sira Tersa (23/05/2017) iha Uma Fukun Parlamentu Nasional.

Nia hatete, ohin loron konsentra ba prosesu dezenvolvimentu, joven sira tenke fo kontribuisaun tanba tempu uluk jerasaun tuan fo forsa enerjia ba luta rezistensia, ohin loron jerasaun foun tenke fo forsa enerjia ba buat neebe dadaun lao hodi halo diak ba nasaun, tanba nee husu ba Timor oan sira liu-liu ba joven sira tenke aprende halo bisnis, se la aprende halao bisnis aban bainrua ema seluk mak sei kontrola nasaun ida nee liu-liu iha area bisnis.

Iha fatin hanesan Deputadu husi Bancada FRETILIN Paulo Moniz hatete, Timor-Leste foin ukun aan tinan 15, presiza halo dezenvolvimentu ba ekonomia, maibe presiza apoiu husi nasaun seluk atu nunee bele hetan esperensia hodi hadia ekonomia rai laran.

Nia liga ba konferensia internasional ba G7+ nian neebe mak halao foin lalais nee, presiza duni atu nunee lori nasaun nee ba oin.

Tuir observasaun jornalista iha terenu nota katak ema neebe mak halao bisnis iha rai laran iha bontade makas maibe oras nee dadasun Bisnis iha sidasde Dili ba too Munisipiu, domina husi Xina sira, tanba nee governu presiza tau atensaun ba kestaun nee hodi dezenvolve Timor oan sira iha area bisnis. Guilhermina Franco

Suara Timor Lorosae