quarta-feira, 10 de maio de 2017

PE. MARTINHO GUSMÃO : LAIHA LEI OBRIGA LU-OLO HUSIK FRETILIN

Pe. Martinho Gusmão hateten, laiha lei obriga Prezidente Republika (PR) eleito, Francisco Guterres “Lu-Olo”husik kargu prezidente partidu FRETILIN durante mandatu tinan 5 (2017-2022).

Tamba, iha lei partidu politiku (parpol) no estatuto Prezidente Repúblika lá define katak, prezidente eleitu ne’ebe mai husi partidu tenki sai husi Prezidente partidu.

“Ha’u hanoin iha ita nia lei kona-bá partidu politiku la define buat ida ne’e, depois estatuto kona-bá prezidensia da repúblika mós la define buat ida ne’e, no konstituisaun fó bareira entretantu, maibe ida ne’e kabe ba buat ida instrumentu legal ita seidauk formula didiak,”Pe.Martinho Gusmão, afirma asuntu refere ba JN-Diário Tersa (09/05/2017) iha Delta Nova-Dili, hafoin partisipa selebrasaun aniversario Conselho Imprensa (CI) ba dala 1.

Tuir Pe.Martinho Gusmão nia hare, sentidu ida ne’e foin primeira-vez Prezidente Partidu ida sai Prezidente da Repúblika, tamba ne’e presiza halo definisaun ida ne’ebé klaru.

“Prezidente eleito Francisco Guterres Lú-Olo, bele sai membru partidu politiku, maibe nia mós bele sai nafatin Prezidente Partidu, nune’e wanhira nia ezerse nia funsaun mak foin hare iha ne’ebá, tamba iha konstituisaun koalia kona-bá inkontabilidade, ”esklarese Pe. Martinho Gusmão.

Nia dehan, seidauk klareza kona-bá ninia andamentu, tamba nia seidauk hare, maibe Prezidente partidu FRETILIN ne’e sei bele hala’o nia funsaun partidu ninia,tamba seidauk tomada de posse.

“Ida ne’e ha’u seidauk iha klareza kona-bá ninia andamentu la’o oinsa, ha’u seidauk hare, maibe agora nia sei bele hala’o servisu partidu nian, tamba seidauk simu posse, nune’e depois de 20 Maiu mak bele define,” esklarese Pe. Martinho Gusmão.

Maibe nia dehan, Konstituisaun koalia kona-bá  funsaun públiku ruma, tenki iha konsensu ne’ebé ba ema hotu no tenki aplika, aliende Parlamentu Nasional tenki halo ninia estatuto ne’e ho klaru. tos

Jornal Nacional Diário

1 comentário:

Anónimo disse...

AMU MARTIHO NIA KOMENTARIU NE MOS DIAK, MAIBE FURAK LIU MAKA LIDER SIRA HATUDU EZEMPLU HODI SERVE HANESAN PRESEDENTE KONSTITUSIONAL BA RAI DOBEN RDTL. TAMBA NE, MESMU KE SIDAUK IHA LEI KE DEFINI ESPESIFIKAMENTE KONA BA KESTAUN NE, MAIBE ESPIRITU FILOSOFIKU KONSTITUSIONAL EM SI PROPRIU KLARU, TAMBA NE DIAKLIU LIDER HUSI ALTA MAGISTRATURA DA REPUBLIKA MAKA FOTI GESTU DE ESTADU HODI KUMPRI ESPIRITU ESTADU NEBE VIGORA ONA IHA KRDTL 20 DE MAIO 2002 NIAN.

ISTORIA KONSOLIDASAUN ESTADU DE DIREITU DEMOKRATIKU DA RDTL, SEI REFERE BA SR LU OLO, HANESAN O EXEMPLAR BA FUTURU, NO IDA NE SEI SAI HANESAN AKTU MARKANTE E DECISIVU. ESPERA KATAK HANESAN EMA NEBE HETAN ONA EDUKASAUN IHA AREA JURIDIKU, SR LU OLO, HATENE MUITO BEM SAIDA MAKA KONSTITUISAUN HAKARAK DEHAN BA NIA HANESAN EMA NEBE ASUMI KARGO NUDAR TL1. MAIBE SE HANOIN DEIT PODER POLITIKU, ITA SEI KONTINUA BUKA RAZAUN HODI DESAFIA MALU HO OBJETIVU ATU KONTINUA MANTEM SITUASAUN ESTATUS QUO!....WAOOOOO...