segunda-feira, 22 de maio de 2017

“Restaurasaun Independénsia no Restaurasaun dignidade ema nian”

PARTILHAR
Artigu ba públiku nudár forma husi komemorasaun ba loron restaurasaun independénsia Timor-Leste


20 de Maiu 2017, kompleta tinan 15 ba restaurasaun independénsia Povu Timor-Leste nian. Restaura independénsia ida ne’ebé Saudozu Francisco Xavier do Amaral ho FRETILIN proklama ona iha 28 Novembru 1975, maibé lalais de’it hetan  destruisaun husi aggressor militár Indonézia.  Ho apoiu husi Estadus Unidus Amerika, Australia no nasaun sira seluk. Indonézia invade duni territóriu ne’ebé iha hela prosesu ba deskolonizasaun.

Saudozu proklamador nia monumentu tuir planu Governu nia, sei inagura iha dia 20 de maiu 2017 iha Rotunda eis Merkadu Lama, besik atuál CCD no rua de liberdade imprensa. Monumentu ida ne’e la’ós de’it reprezenta fizikamente Saudozu nia, maibé liu-liu reprezenta ideolojia libertasaun total ne’ebé sira defende iha momentu difisil sira. Fiar katak monumentu ida ne’e kontinua fó korajen no determinasaun ba foin-sae sira hodi luta ba valor igualidade ekonómiku iha fenomena ukun rasik an.

20 de Maiu 2002, Timor oan politikamente moris ho orgullu no euforia tanba Restaura ona independénsia ne’ebé Indonézia nia militár sira destroi. Maske laiha tan ukun formál koloniál husi rai li’ur, maibé estragus barak kontinua hein hela atu restaura totálmente ita-nia independénsia. Nasoins Unidas nia administrasaun sira la konsege ajuda hakotu impunidade ba krime internasionál ne’ebé akontese iha Timor-Leste, no seidauk dezenvolve sistema ekonomia sustentável ba Timor oan sira, maibé husik hela todan hirak ne’e atu Timor oan mesak enfrenta nudár povu, nasaun no estadu.

Restaurasaun mak asaun harii ka hadi’ak hikas buat hotu ne’ebé estraga tiha ona. Importante tebes ba ita hotu atu hanoin saida mak signifikadu loloos ba ‘Restaurasaun Independénsia RDTL nian’. Nudár lee na’in no ema barak hatene, Timor-Leste nia prosesu deskolonizasaun no independénsia unilateral hetan distruisaun husi Militár Indonézia, restaurasaun tenke refleta duni ba destruisaun tomak atu hadi’ak.

Durante okupasaun ilegál, Populasaun Timor, liu rihun atus rua mak lakon vida liu husi oho, halakon forsadu no hamlaha. Periodu hamlaha naruk uluk nian lori mai ohin loron, sofrementu malnutrisaun kroniku ba populasaun sira ne’ebé konsege salva husi mate. Inan no aman sira maioria mak sofre hamlaha no malnutrisaun kroniku, Atu la repete malnutrisaun uluk nia, Governu presiza halo investimentu ida signifikante ba iha setór sira ne’ebé bele ajuda labarik sira nia nutrisaun, nune’e evita hafraku oan sira nia kapasidade iha eskola no limita produtividade di’ak.

Ema sira ne’ebé mate no lakon, seidauk iha prosesu justisa no akontabilidade, dignidade umanu husi ema sira ne’ebé mate no terus durante okupasaun ilegál seidauk Restaura liu husi justisa, inklui autór kriminozu sira kontinua livre husi responsabilidade kriminál.  Maioria husi liman ran hirak ne’e kontinua hela ho podér iha sistema Polítika estadu Indonézia nia no kontinua sai obstákulu ba prosesu demokratizasaun iha nasaun Indonézia, nune’e Timor-Leste kontinua iha dalan naruk atu hetan justisa ba kazu krime kontra umanidade.

Relatóriu CHEGA! deskreve klaru esperiénsia aat ne’ebé ita enfrenta durante okupasaun ilegál. Ita nia estadu seidauk hakarak Restaura dignidade oan kiak no feto faluk sira, seidauk mós Restaura ema ho sofrementu moras husi tortura sira. Presiza tau matan ba sira, ha’u hanoin, karik estadu hadi’ak asisténsia saúde públiku ho kualidade ba sidadaun tomak inklui sofrevivente sira bele hetan tratamentu saúde di’ak.

Maske laiha tan ona Militár atu viola inan feto hirak ne’e, maibé entre sira ne’ebé hetan sofrementu kontinua marzinalizadu husi sosiedade Timor nia, sofrevivente no vítima hirak ne’e nia dignidade seidauk hetan restausaun husi perpetrator sira ka Governu Indonézia. Estragus no distruisaun ne’ebé militár Indonézia sira komete, Governu rua ka Komunidade internasionál seidauk iha vontade atu halo restaurasaun no reparasaun loloos husi estragus hirak ne’e.

Agora, edukasaun no saúde gratuita ba sidadaun sira. Infelizmente, gratuita ida ne’e lao hamutuk ho kualidade mukit durante tinan 15 ikus. Maioria husi populasaun Timor nian sei falta bee no saneamentu, falta kondisaun hodi hahú hadi’ak ekonomia familiar inklui hadi’ak oan sira nia nutrisaun. Husi servisu uitoan ba saúde no edukasaun, bee no saneamentu Governu fó atensaun barak liu iha Dili hanesan kapitál nasaun nia, realidade ita nia P=populasaun maioria hela iha area rural no moris nudár agrikultór, husi maioria ida ne’e kontinua hela ho difikuldade oin-oin ba hadi’ak sira nia moris.

Ita nia estadu atualmente uza persentajen boot husi osan uitoan ne’ebé ita iha, ba projetu boot sira ne’ebé nia returnu espetativa la klaru, projetu hirak ne’e mós sei hariku de’it kompañia privadu no elite sira ne’ebé maneja kontratu estadu nia. Nudár ezemplu, tinan sanulu ikus ne’e, kada tinan orsamentu jerál estadu maioria parte gasta ba Portu aeroportu, estrada, projetu tasi mane no ZEESM iha Oecusse. Konsentrasaun ba projetu boot hirak ne’e marzinaliza tiha setór sira ne’ebé pertense ba maioria Populasaun. Ita nia ekonomia kuaze hotu depende ba osan husi mina no gas no kuaze nesesidade ekonomia tomak populasaun nian hetan husi importasaun.

Maske iha diskursu barak husi autoridade Governu nian kona-ba diversifikasaun ekonómiku maibé diskursu hirak ne’e dezvia de’it atensaun populasaun nian, ho intensaun prezerva sira nia podér duke onestu no buka solusaun sustentável. Diskursu sira durante debate OGE 2017, nakonu ho mensajen prioritiza setór edukasaun, saúde no agrikultura maibé realidade kontradís tebes entre propaganda no Alokasaun orsamentál. Projetu boot sira kontinua hetan atensaun boot liu iha OGE 2017 no Provizaun ba oin.

Ha’u hanoin, Restaurasaun la’ós de’it iha kontextu Polítika maibé restaurasaun ida ne’e presiza refleta mós iha dignidade ema nian. Restaurasaun ida ne’e sei laiha valor kuandu ema ho podér Polítiku no ekonomia kontinua hela ho moris priviléjiu no maioria husi Populasaun kontinua hela ho moris mizeria.

Oinsá mak ita nia rai bele Restaura valor “igualidade”?  La ajuda prosesu restaurasaun se kontinua abandona povu no husik hela ema riku uitoan de’it mak deside no benefisia riku soin Povu nian. Atu Restaura valor igualdade, tenke investe ba setór sira ne’ebé fó benefísiu ba Povu, fornese oportunidade hanesan ba sidadaun sira ho kualidade atu dezenvolve moris ida justu no iguál.

Parabens ba Povu Timor! Benvindu Prezidente foun Timor-Leste nia, Sr. Dr. Francisco Guteres LúOlo

A Luta Kontinua!

* Celestino Gusmão, membru Aliansa Nasional Timor-Leste ba tribunal Internasionál no nudár staff iha La’o Hamutuk.
PARTILHAR

Author: verified_user

Publicação luso-timorense sem fins lucrativos

0 comentários: