terça-feira, 20 de junho de 2017

Hisik Kosar ba Moris Di’ak, Loriku Apoiú Taur

DILI, (TATOLI) - Prezidente Loriku Movimentu, Saimon Salsinha deklara apoiu Partidu Libertasaun Populár (PLP) ne’ebé diriji husi eis-prezidente repúblika, Taur Matan Ruak hodi realiza komprímisu no mehi “Hisik Kosar ba Moris Di’ak”.

 “Loriku Movimentu aprezenta mós ninia manuál polítika ba belun boot, Taur Matan Ruak hodi bele realiza komprímisu ne’ebé Loriku Movimentu tatoli ba PLP,” deklara prezidente Saimon Salsinha, ohin iha Kolmera, Díli.

Hodi tane no dignifika juventude loriku aas wa’in Timor-Leste ne’ebé nu’udar pilar importante iha prosesu konstrusaun estadu direitu demokrátiku.

Tanba ne’e Loriku Movimentu apela ba Timor-Leste, husi Oe-cusse to’o Jaco, Tasi feto to’o Tasi mane, faluk no oan ki’ak no terus na’in katak tempu hodi haree mudansa ba moris.

“Fó votu konfiansa ba belun Taur Matan Ruak liuhusi komprimisu PLP katak rekursu hanesan, oportunidade hanesan diskriminasaun lae ba povu Timor,” prezidente Saimon Salsinha deklara tan.

Konsolidasaun forsa, vitória ba transformasaun nu’udar promesa sagrada ne’ebé Loriku Movimentu sei tatoli ba PLP hodi bele asegura komprímisu sai realidade bainhira PLP hetan vitória.

“Hamutuk ita asegura vitória ba transformasaun hodi hisik kosar ba moris di’ak liuhusi apoiu ba Taur Matan Ruak hodi realiza mehi povu Timor-Leste ba moris di’ak,” nia afirma.

Partisipa iha deklarasaun ne’e mak reprezentante prezidente partidu, Fidelis Magalhaes no estrutura nasionál.

Antes ne’e mós eziste mós Movimentu Apoiú Xanana (MAX) deklara ba públiku hodi fó apoiu Maun Boot Kay Rala Xanana Gusmão iha Partidu CNRT hodi manan elisaun ne’ebé mak sei mai.

Jornalista: Rafy Belo | Editór: Manuel Pinto

Sem comentários: