Lingua Sai Bareira Ba Jovens Hetan Bolsu Estudu

Conselho Nasional Joventude Timor –Leste (CNJTL) konsidera konesementu ba lingua sai bareira ba iha joven sira atu asesu ba oportunidades ne’ebe oferese husi nasaun vizinho sira, liu –liu bolsu estudu no servisus iha rai liur.

Prezidente CNJTL, Maria Dadi Magno rekonese katak ida ne’e obstaklu bo’ot ida tanba realidade joven barak iha komitmentu no hakarak atu estudu no servisu iha rai liur, maibe lingua difikulta sira atu komprende rekezitus hodi kompleta sira nia dokumentus. 

“Ho konesementu lingua barak mak ita bele atinji ita nia mehi, tanba laiha ona bareira ba ita atu asesu ba oportunidade sira ne’ebe lori ita ba to’o iha buat ne’ebe ita hakarak,” nia hateten iha nia knar fatin Palapso, Dili. 

Atu responde ba situasaun hirak ne’e, nia dehan CNJTL hanesan mahon ba foinsa’e sira oferese formasaun gratuita ba lian Portugues no Ingles.

Nia hateten, iha joven barak mak badinas buka informasaun no integra aan voluntariomente iha organizasaun non-governmentais sira hodi ganhar esperiensia ba dezenvolve pesoal, maibe lubun balun baruk no kontinua involve aan iha problema sira. 

Maske nune’e, nia rekonese mos katak iha joven barak mak hetan ona oportunidade ba eskola no servisu iha rai liur, tanba sira esforsu aan estuda lingua. 

Iha parte seluk, joven husi munisipio Liquisa Cesarino Gonçalves hatete joven barak lakohi esforsu aan atu buka kapasita aan liu husi tuir kursu lian Portugues no Ingles.

Nia hatete, ohin loron oportunidade estuda iha rai liur barak los, depende ba joven ida-ida atu prepara aan intermus abilidade ba lingua hodi bele kompete.

“Lingua mak dalan ba ita atu deskobre siensia hotu iha mundu no fasil liu asesu ba kampu servisu, tanba ne’e importante tebes ba ema ida –ida liu –liu foinsa’e sira atu tuir kursu ruma iha lian Ingles no Portugues,” nia hateten.

Alende ne’e, nia mos husu ba governu presiza dezenvolve diak liu tan lingua Portugues iha ensino, tanba lian Portugues alende lian Tetun mos sai lian ofisial tuir konstituisaun RDTL.

Paulina Quintão | The Dili Weekly