VII Governasaun Labele Partidariza Administrasaun Públika

DILI, (TATOLI) - Primeiru Ministru (PM), Dr. Rui Maria de Araújo husu ba membru governu foun mai labele partidariza administrasaun públiku tanba ida ne´e difikulta implementasaun programa governasaun.

“Administrasaun públika ne´e importante tebes. Tanba ne´e, labele partidariza demais administrasaun públika. Ho sintidu katak evita ministru no diretór mai hosi partidu ida,” Primeiru Ministru hato´o kestaun ne´e ba jornalista sira iha Palásiu Prezidénsia Repúblika, Bairu-Pité, Dili, segunda ne´e, hafoin ramata inkontru ho Prezidenti Repúbkika, Dr. Francisco Guterres Lú-Olo.

Nia haktuir katak esperiénsia ida ne´e maka akontese iha governasaun bloku durante tinan rua ho balun. Ne´e duni, Rui sujere ba Prezidenti Repúblika atu konsidera aspeitu ida ne´e bainhira hala´o diálogu ho partidu ne´ebé manán iha eleisaun.

“Ita besik ona ba iha eleisaun no formasaun governu foun. Aproveita diskusaun ohin, ha´u sujere ba Prezidenti Repúblika atu konsidera aspeitu ida ne´e bainhira diálogu ho partidu polítiku sira ne´ebé manán eleisaun,” nia haktuir.

Governu foun mai, Rui haklaken, presiza reforsa administrasaun públika. Tuir nia katak partidu ne´ebé ukun bele iha polítika ne'ebé di´ak maibé bainhira administrasaun públika la forte para implementa polítika sira ne´e, ninia rezultadu iha prátika sei la másimu.

Primeiru Ministru mós hato´o ba Xefi Estadu Lú-Olo kona-ba reuniaun Konsellu Ministru nian ne´ebé sei hala´o iha semana hirak mai tan. Tanba atu tama ona ba iha eleisaun, entaun governu sei haree asuntu sira ne´ebé importante teb-tebes ne´ebé presiza foti desizaun entaun sei foti desizaun.

Jornalista: Xisto Freitas | Editór: Manuel Pinto

Foto: Primeiru Ministru, Dr. Rui Maria de Araújo ko´alia ba jornalista sira hafoin ramata inkontru ho Xefi Estadu Lú-Olo.