DEKLARASAUN HUSI 23 BOLSEIROS NEBE MAK HAKARAK KONTINUA ESTUDO IHA CABO VERDE

DEKLARASAUN HUSI BOLSEIROS 23 PESSOAS  NEBE MAK HAKARAK KONTINUA ESTUDO IHA CABO VERDE NO HUSU ASSISTENSIA URGENTE HUSI PARTE KOMPETENTE LILIU MINISTERIO EDUKASAUN

Ami husi bolseiros cabo verde nebe mak compostu husi 43 pessoas nebe mak oras nee dadaun halao hela ami nia estudo iha cabo verde  maibe depois de Tinan ida iha problemas no consequensias oin oin nebe mak ami hasoru relasiona ho  ami nia estudo, segurança no saúde inklui ambiente nebe mak ami hela ba no mos la iha representantes Timor oan ida nebe mak aproxima ami hodi trata no hataaan kona ba ami nia problemas sira nee hotu . Alem de ida  ami mos hatoo ona ba S.E Ministro Educasaun no Sr.Diretor geral maibe seidauk iha assistensia nebe mak urgente hodi trata kona ba ami nia problema sira nee.

No relasiona ho problemas hirak nee ami mos konsege halo greve hodi para eskola durante  fulan ida maibe finalmente desizaun husi Conselho Ministro fo tuun mai  iha Opsaun Rua:

Mantem estuda iha Cabo Verde.

Fila ba Timor hodi hakotu kontratu ho Ministerio Edukasaun.

Nee duni ami  hamutuk 23 pessoas respeita desizaun hodi desidi ami nia futuru no ami nia destinu nuudar estudante  hodi kumpri no halo tuir proposta nebe tuun husi konselho Ministru  hodi kontinua halao ami nia estudo to remata mak foin bele fila ba Timor hodi nunee bele kontribui ba prossesu konstrusaun nasaun ida nee.  Alem de ida Nee ami mos tuir ona Exame ba segundo chamada no hetan assistensia diak tebes husi ami nia Docente sira. Nee duni ami husu ba Governo liu husi Ministerio Edukasaun atu lalais fo assistensia ba ami tambá oras nee dadaun ami mos hasoru preocupasaun ida nebe mak halo ami senti la satisfaz ate seidauk iha ema iha mak hataan ba ami nia lamentasaun ida nee.

Hanesan problema Residensia ka hela fatin nebe mak la seguro mai ami. Alem de ida nee ami mos buka ona apartamento seluk nebe mak ita bele dehan katak seguru no kondisaun diak maibe ho preço nebe mak aas tebes.

Relasiona ho kestaun residensia ami mos hato ona ba Equipa investigasaun nebe mak Lidera husi Sr.Inspector Jeral atu hato ba S.E. Ministro edukasaun hodi buka fatin nebe mak seguru atu nunee ami bele hela ba maibe to agora seidauk iha resposta.

Mak nee deit ami husi 23 pessoas la haluha hatoo ami nia Obrigado wain.

Praia 24/08/2017