Timor Oan Hetan Bolsu Estudu

DILI – Estudantes Timor oan hamutuk nain  24  hetan bolsu estudu husi  Embaixador Indonezia iha Timor Leste atu ba kuntinua sira nia estudu iha Indonezia.

Liu husi intervista ba jornalista, Embaixador  Indonesia iha  Timor Leste, Sahat Sitorus, hatete, Ministeriu Negosiu  Estranjeiru servisu hamutuk ho Ministeriu  Edukasaun  Arte  no Kultura Indonezia nian, hodi bele halao  programa investimentu estudante atu bele hasae sira nia matenek hodi servisu nasaun foun ida nee.

“Dalam hal ini kementrian luar negeri kerja sama dengan kementrian pendidikan dan  kementrian kebudayaan ini dalam program mahasiswa, program investasi mahasiswa  ke depan  dalam rangka  membina persahabatan  dan meningkatkan kualitas  anak-anak mudah mahasiswa,” dehan  Sahat  ho lian Indonezia ba jornalista  iha  edifisiu Kultura Indonesia,  Mascarinhas  Dili  Kuarta  (23/08/2017).

Iha  fatin  hanesan  kordenadora  do administrasaun  finansa no rekursu humanu  iha fundu dezenvolvimentu  capital  humanus (FDCH), Leila  Carceres, dehan, programa nee bolu ho programa biasiswa  darmasiswa neebe  mak mai husi nasaun  Indonesia liu husi  Ministeriu Edukasaun  no Kultura   neebe mak liu husi  embaixada  Indonesia iha  Timor Leste  (TL), hanoin  ida nee programa diak tebes-tebes.

“Nee bolu biasiswa  darmasiswa neebe  mak mai husi nasaun  Indonezia liu husi  Ministeriu Edukasaun  no Kultura   neebe mak  atra ves liu husi  embaixada  Indonesia iha  Timor Leste  (TL), hanoin  ida nee programa diak tebes-tebes, ohin embaixador mos dehan, programa nee hahu kleur tiha ona, maske sira nian orientasaun ba rai seluk, maibe agora  sira hakarak mai besik liu nasaun ASEAN ninia, tanba ita Timor mos hanoin hela atu tama ASEAN, entaun  ida nee hanesan oportnidade ida neebe mak diak  ba ita nian joven sira neebe mak  hakarak atu ba partisipa,”dehan nia.

Nia hatete, aproveita mos ho pusat budaya Indonesia  (PBI), neebe mak  sira  fo  lian bahasa,  atu nunee joven sira  bele mai partisipa, atu nunee aban bain rua  iha oportunidade sira bele tenta para hetan oportunidade ba iha bolsa ida nee.

“Hau hanoin parte husi ita nia governu agradese tebes, tanba ida nee entre nasaun, entaun diplomatiku tebes katak, ita nian nasaun mos tenke iha koinesementu,”dehan nia.

Nunee mos   Diretor  Nasional  ensinu  superior  tekniku   iha  ME,  Luis  Aparicio  Guterres, hatete, diresaun  ensinu superior  tekniku ninia, neebe mak durante nee, iha  sira nian parte prepara ema  ba tuir kursu  ou ba eskola iha Indonezia, liu-liu  area teknika ninia, la kleur tan  estudante  nain  24  sei ba iha Jogja Indonesia.

“Iha hau nian area ensinu superior tekniku ninia, neebe mak durante nee, iha ami nian parte prepara ema ba tuir kursu iha Indonesia, liu-liu area teknika ninia, la kleur tan ita nian estudante nain  24 sei ba iha Jogja, ida nee mak kooperasaun  governu Indonesia, liu-liu iha ministeriu Maritima no peska, neebe mak servisu hamutuk ho ami nian diresaun,”dehan nia.

Nia hatete, kooperasaun nee lao tiha ona, tanba nee, ba oin kooperasaun ida nee sei laiha limitasaun, no ba oin, relasaun ida nee sei diak liu tan iha futuru.

Estudantes  24  sei kontinua sira nian estudu iha  Joqja, Semarang, Bali no  Bandung, no  estudante sira nee  sei  estuda  iha area, turizmu, muzika, lian no agrikultura, tuir planu estudante sira nee sei aranka iha loron  28 fulan ida nee. 

Jacinta Sequeira | Suara Timor Lorosae