Partisipasaun Setor Privadu Ba Dezenvolvimentu Menus

DILI – Partisipasaun setor privadu ba dezenvolvimentu rai laran sei menus, tanba nee numeru dezempregu aas, Timor oan barak buka servisu iha ema nia rai.

Kestaun nee fo sai husi Diretur Ezekutivu Camara Comresiu Industria Timor Leste (CCI-TL), Nuno Trindade ba STL, Kuarta (02/08/2017) iha nia knar fatin Akait.

“Hau hanoin dezempregu iha rai laran aas tanba, partesipasaun setor privadu nian sei menus, tanba too ohin loron projetu boot sira neebe lao iha rao laran, governu fo ba ema liur no la involve Timor oan sira iha laran, tan nee ema liur mai lori kedas nia ema, no la kria servisu ba Timor oan,” dehan Nuno.

Nia mos hatuir tan katak, atu redus numeru dezempregu iha rai laran maka governu tenke tau matan ba setor privadu rai laran, projetu sira neebe lao iha rai laran Timor oan maka tenke kaer, atu nunee fo servisu ba Timor oan sira, no sirkulasaun osan Dolar nee labele sai hotu ba rai liur.

Iha fatin hanesa membru CCI-TL, Albeto da Costa mos hatutan, TL seidauk iha investimentu boot neebe atu fo servisu ba Timor oan sira, foin maka Kompania Heneiken neebe fo servisu ba Timor oan balun, no iha konstrusaun sivil nee barak maibe, ida nee tempurariu deit. Madalena Horta

Suara Timor Lorosae