PLP hakarak sai opozisaun maibé bele hakarak halo parte iha Governu

Partidu Libertasaun Popular (PLP) hakarak sai hanesan opozisaun iha parlamentu timoroan oinmai, maibé bele hakarak halo parte iha Governu, hodi hatudu disponibilidade hodi ko'alia ho partidu ne'ebé hetan liu votu, Fretilin.

Fidelis Magalhães, líder ida hosi partidu, hatete iha loron-kinta katak PLP nia preferénsia maka hela iha opozisaun, maibé la hasai posibilidade, bainhira husu rasik hosi Lusa kona-ba posibilidade ne'e, bele iha membru ruma iha ezekutivu tuirmai.

"Halo espekulasaun kona-ba posibilidade ida iha futuru hosi PLP hodi halo parte iha Governu sei hanesan sedu tebes", nia afirma iha Palásiu Prezidensial.

Fidelis Magalhães ko'alia hafoin partisipa tiha, ho líder hosi partidu nian Taur Matan Ruak (antigu xefe Estadu), iha enkontru ida ho Prezidente Repúblika, Francisco Guterres Lu-Olo, ne'ebé iha loron-kinta ne'e hahú rona partidu polítiku eleitu sira ba parlamentu nasional hodi harii Governu.

Hafoin reuniaun, Taur Matan Ruak lakohi ko'alia ba jornalista sira hodi hatudu deklarasaun sira ba Fidelis Magalhães ne'ebé maski hanesan, tuir dalan formal, visi-prezidente dahaat PLP nian maibé sai hanesan líder prinsipal hafoin eis-Prezidente Repúblika nian.

"Ami nia preferénsia, hanesan inísiu maka hela iha opozisaun. Partidu iha liu vokasaun hodi halo parte iha opozisaun", nia hatete.

Deputadu eleitu hatete katak hahú hela "iha inísiu prosesu nian" ne'ebé halo hosi Prezidente Repúblika no tenki "rona opiniaun sira hosi partidu ne'ebé hetan liu votu", Frente Revolucionária do Timor-Leste Independente (Fretilin).

"Importante liu agora maka ko'alia kona-ba fahe funsaun sira ka pasta Governu nian. Ne'e ladún iha interese mai ami. Buat ne'ebé ami hakara maka fasilita prosesu konstitusional ne'e hodi avansa tuir dalan no rona desizaun no orientasaun sira hosi señór Prezidente Repúblika", nia hatete.

Hasoru insisténsia hosi Lusa kona-ba karik esklui tuir limiti atu PLP la halo parte iha Governu, Fidelis Magalhães hatete katak rona Fretilin hanesan "sentidu Estadu nian" no buat sira seluk hanesan espekulasaun sira.

"Buat ne'ebé maka ami hakarak agora daudaun maka rona no aseita konviti hosi partidu ne'ebé hetan liu votu hodi dialoga. Ami halo ne'e ho sentidu Estadu nian, ne'ebé hanesan importante liu", nia hatete.

"Ha'u laiha imajinasaun fértil. Ami iha daudaun prosesu ida, ami tenki tuir prosesu. Agora ami iha inísiu. Ha'u lakohi halo espekulasaun. Fretilin sei iha ami nia apoiu tomak, ho nosaun Estadu nian. Ami sei halo diálogu, ami sei kopera", nia konsidera.

Hatán kona-ba faktu katak Taur Matan Ruak indika ona katak sei la tuur iha Parlamentu Nasional, Fidelis Magalhães hatete ona katak líder hosi PLP "sei kontinua kaer knaar importante iha partidu nia laran".

"La marka prezensa fízika iha parlamentu la implika katak prezidente partidu nian sei laiha prezensa polítika ida. Nia sei diriji nafatin partidu", nia afirma.

Francisco Guterres Lu-Olo simu iha loron-kinta ne'e delegasaun sira hosi Fretilin, hosi Congresso Nacional da Reconstrução Timorense (CNRT) no hosi PLP no iha loron-sesta simu líder sira hosi Partidu Demokrátiku (PD) no hosi Kmanek Haburas Unidade Nacional Timor Oan (KHUNTO).

SAPO TL ho Lusa