Fahe Estratéjia Forsa Navál EUA-TL Treina Hamutuk

DILI, (TATOLI) - Forsa Navál Estadu Unidu Amérika (EUA) no Falintil-Forsa Defeza Timor-Leste (F-FDTL) treina hamutuk iha ezersísiu anuál CARAT (Cooperation Afloat Readiness and Training) hodi hadi’a kapasidade seguransa marítima no hasa’e kapasidade téknika no ekipamentu inklui haforte serbisu ekipa militár nian ho efetivu.

Kapitaun Korpu Mariña EUA, Chris McFadden hateten, F-FDTL sira treinadu di’ak ona, forsa navál EUA mai hodi fahe abilidade no estratéjia hodi hala’o atake ba grupu ki’ik organizadu sira.

“Agora ami mai ne’e atu fokus liutan kona-ba oinsa fahe abilidade no estratéjia ba malu kona-ba oinsa atu ba ataka grupu ki’ik oan sira. Tanba ne’e, espera katak sira (F-FDTL) sei dezenvolve aan di’ak liutan,” hateten kapitaun Chris McFadden, iha Hera, Díli, ohin ba profisionál komunikasaun sosiál sira.

Forsa EUA no F-FDTL iha ona relasaun no sensu unidade metin no iha relasaun hanesan forsa navál no mariña.

“Hanesan forsa mariña, ami iha ona sensu unidade ne’ebé metin ona, mai hela hamutuk ho sira (F-FDTL) durante semana ida nia laran hodi haforte liutan kamaradajen atu serbisu di’ak liutan iha futuru,” kapitaun ne’e reforsa.

Komandante exersísiu CARAT, kapitaun Duarte Borges Loe informa, iha treinamentu ne’e sira aprende buat barak relasiona ho forsa navál, fuzileiru no mariñeiru nian. “Importante liu mak oinsa ita kria relasaun individuál,” akresenta kapitaun Loe.

Iha parte fuzileiru nian, aprende oinsa mak halo kombate, ba navál nian sira halo kolesaun ba evidénsia iha tasi. Sira halo mós oinsa mak halo reparasaun ba outdoor engine no diving (luku).

“Kada tinan ita halo ida ne’e, maibé tinan ida ne’e, ita halo de’it buat haat ida ba fuzileiru, ba tolu seluk ita halo iha navál,” nia hateten.

Hodi informa tan katak luku nian, forsa EUA hanorin oinsa F-FDTL uza ekipamentu sira ba iha tasi, oinsa mak halo kombate no protesaun iha tasi bainhira iha atake ruma ba meius ne’ebé utiliza.

Ba iha outdoor engine ne’e, refere ba ró ki’ikoan sira ne’ebé mak F-FDTL sira iha. Sira aprende oinsa mak bele opera no kuidadu ró ne’e, manutensaun ró ne’e nomós kuidadu.

Kolesaun evidénsia, forsa EUA fó no fahe koñesimentu sira ne’ebé mak sira iha. “Ne’e di’ak tebes tanba ita aprende sira-nia SOP (Standar of Procession) balun hodi kompleta buat ne’ebé ita iha,” kapitaun Loe esplika.

Entretantu, treinamentu hamutuk entre forsa navál rai rua nian, Timor-Leste kompostu husi forsa na’in 20 no forsa EUA na’in 21, hamutuk 41. Treinamentu ne’e rasik hala’o hahú 31 jullu no termina 4 agostu, aban, inklui Unidade Polisia Maritima (UPM).

Jornalista: Rafy Belo | Editór: Manuel Pinto

Foto: Komandante exersísiu CARAT, kapitaun Duarte Borges Loe. Foto Tatoli: António Gonçalves.