Informasaun Iha Facebook Ameasa ba Obra Jornalista Nian

Konselheiro Konselho Imprensa (KI) Timor-Leste, Paulo Araujo hateten informasaun sira iha media social hanesan facebook bele sai ameasa ba iha servisu jornalista nian, tanba ema barak asesu liu informasaun iha ne’eba duke notisia iha jornal sira.

Nia dehan, facebook hanesan media social ida ne’ebe mosu ho programa internet no ema hotu bele transforma informasaun iha ne’eba no lais liu maibe sem peskiza ida ne’ebe klean kona ba informasaun ne’ebe sira tau ba.

“Tanba jornalista nian sei liu husi peskiza ho tratamento editorial, sei liu husi prosesu naruk ida foin hatun notisia ida, enkuantu facebook la presiza buat barak atu hasai notisia ba publiku,” nia hateten via telefone.

“Entaun ida ne’e sai ameasa ba jornalista iha Timor, tanba agora ema uza facebook hanesan fontes ba informasuan, lais liu, liu-liu rezultadu elisaun jeral rua foin lalais ne’e, ema barak liu akompanha liu husi facebook.”

Tanba ne’e, nia sujere kada instituisaun media presiza reforsa servisu jornalismu nian, tenke hametin kredibilidade jornalista nian.

“Importante liu mak ita tenke hametin kreabilidade ho ita nia servisu nudar jornalista. Ita tenke promove ita nia media hanesan jornal, radio no televizaun, kontinua hetan lejitimidade husi publiku ho diak,” nia sujere. 

Nia parte la kontra facebook, tanba ida ne’e hanesan media social ida no ema hotu iha direitu atu asesu maibe tenke ho responsabilidade.

Iha sorin seluk Vise Prezidente Asociasaun Jornalista Timor-Leste (AJTL), Zevonia Vieira hateten nia parte la hakfodak tanba facebook la’os media professional maibe media sosial.

“Media professional ne’e iha nia regulamentu , iha kode etika, iha lei no iha organizasaun ida ne’ebe mak toma konta sira no jornalista sira tenke tuir formasaun ne’ebe iha, nune’e sira bele komprende sira nia knar,” nia hateten.

Nia rekonese, katak dalabarak ema fiar liu informasaun liu husi facebook maibe dalabarak mos ema balun uza faceboook hodi halo propaganda situasuan hodi insulta malu maibe sem ho responsabilidade.

“Ida ne’e mak sai hanesan obstaklu ba jornalista hanesan media professional,oinsa kaer metin no asegura, regulamento, kode etika ne’ebe mak iha, atu nu’une’e ema fo fiar nafatin mai ita nia servisu nudar media profesional,”nia hateten.

Alende ne’e, nia mos sujere ba Konselho Imprensa, asosiasaun jornalista sira hamutuk ho media nain sira atu halo dialogu, oinsa atu promove nafatin profisaun media profesional ne’e rasik. 

“Hau garante, katak ita nafatin uza ita nia kredibilidade ,no principiu jornalistiku ne’ebe mak iha ,ema sei nafatin fiar ita,bainhira ita halo duni ita nia knar tuir regulamento ne’ebe mak iha,” nia fiar.

“Katak informasuan ne’ebe ita fo sai ne’e liu husi intervista fontes, iha faktus, iha dadus, akurasia no koko sai independente iha notisia ne’ebe mak ita fo sai.”

Iha sorin seluk jornalista husi media STL, Tomas Sanches hateten ema pasa informasuan via facebook lais liu duke media professional tanba la liu husi prosesu editorial meeting ne’ebe media profeisonal sira halo regularmente.

“Ezemplo iha kazu ruma, sira pasa informasaun ne’e lais liu duke media profeisonal. Maibe la fo amesa ba obra jornalista nian, tanba la garante ninia akurasia no laiha balansu de informasaun, sira sekedar informa liu deit,” nia hateten.

Celestina Soares, Est | The Dili Weekly