AMP Akuza Aniceto Inkapasidade

DILI, (TATOLI) - Prezidente Parlamentu Nasionál (PPN) Aniceto Guterres sente estrañu tanba nia foin hala’o knaar seidauk kompleta fulan tolu deputadu AMP sira bele hetan juizu ba nia dezempeñu katak la iha kapasidade.

“Iha Proposta destituisaun ne’e deputadu AMP sira hahú kedas halo akuzasaun mai ha’u ho Injustificavel incapacidade de gestão e de controlu dos serviços administrativos e dos seus recursos humanos, ne’e akuzasaun ida jenérika ka mamuk tebes, tanba la hatudu fundamentu faktuál ka jurídiku ruma,” PPN Aniceto Guterres hato’o bainhira ko’alia ho imprensa sira iha sala konferénsia Parlamentu Nasionál, Segunda (11/12).

Aniceto konsidera mós akuzasaun Aliansa Maioria Parlamentár (AMP) hatudu momoos deputadu AMP sira nia ignoránsia kona-bá organizasaun hosi administrasaun parlamentár, ninia órgaun sira no ida-idak nia papél.

“Akuzasaun ne’e hatudu momoos katak deputadu AMP sira buka atu habosok sidadaun sira kona-bá sira nia motivu loloos hodi hato’o proposta ne’e, halo ho ma-fé no ho intensaun kalunioza,” Aniceto lamenta.

Entretantu iha destituisaun AMP mós akuza Prezidente Parlamentu Nasionál, Aniceto Guterres katak la defende nia devér hodi tane dignidade parlamentu nasionál hasoru insultu hosi Primeiru Ministru  no atakes hosi Ministru Defeza ba deputadu sira na’in 35 opozisaun nian.

Akuza mós Aniceto la iha devér funsionál atu konvense Prezidente Repúblika hodi Prezidente veto lei podér lokál no desentralizasaun.

Konsidera mós Aniceto uza ma-fé hodi viola rejimentu parlamentu nasionál hodi admite proposta lei Orsamentu retifikativu maske hatene hela Orsamentu Retifikativu la iha kondisaun.

Konsidera mós Aniceto Guterres la imparsiál tanba obstakuliza Parlamentu  no akuza hamosu kondisaun ba Surjimentu grave krize institusionál.

Tanba akuzasaun sira ne’e hotu mak nu’udar sidadaun, Aniceto Guterres hatama ona prosesu sivíl “Providénsia Kautelar” ba Tribunál Distritu Dili, Ohin, Segunda (11/12).

“Providénsia Kautelar” la iha definisaun klaru ruma konaba termu ida ne’e iha lian tetun, maibé prátikamente nu’udar asaun protesta ka objesaun ruma atu impede prosesu ruma too desizaun final husi tribunal.

PPN Aniceto mos hatama prosesu ida ba Tribunál Rekursu (TR) husu ba TR atu halo fiskalizasaun abstratu kona ba rejimentu Parlamentu Nasionál, artigu 15 kona ba destituisaun.

Jornalista: Manuel Pinto

Imajen: Prezidente Parlamentu Nasionál, Aniceto Guterres. Foto Antonio Goncalves