CNE Prontu Hadia Failansu Elpar 2017

DILI - Comisaun Nasional Elisaun (CNE) prontu hadia failansu sira neebe akontese iha elisaun parlamentar (elpar) 2017. Maske iha failansu maibe prosesu elpar hetan susesu diak. Hetan partisipasaun makaas husi komunidade no komunidade internasional.

Liafuan hirak nee hatoo husi Sekertariado Ezekutivu CNE Bernardo M. N. Cardoso iha seminar loron ida iha Aula So Joao Paulo Kampung Baru, Komoro, Dili, Kinta (6/12/2017). Seminar refere foti tema: ‘Dili Media Forum’ nee, koalia konaba experiensia sira durante sira halao elpar 2017. I sira sente orguilhu tebes ho elisaun nee tanba primeiru-ves Timor Leste halao rasik pasca misaun ONU.

CNE haree katak, elisaun jeral 2017 (elprez no elpar) lao diak tebes iha teritoriu tomak. Maske mosu failansu durante halao eleisaun jeral nee maibe populasaun partisipa makaas. CNE rekoinese, failansu ida mak konaba kobertura jornalista iha terenu. Maibe CNE konsidera katak failansu sira neebe mosu durante elisaun jeral 2017, laos ostaklu maibe liga ba regulamentu. “Dekreitu lei sira neebe produs mak tarde,” nia dehan.

Obstaklu ida konaba kobertura media nasional sira. Nee mosu no akontese tanba partidu politiku sira halo mudansa ba sira nia orariu kampanha latuir orariu neebe CNE fo sai. Alende nee, CNE mos lahaluha hatoo agradese ba PNTL tanba fo apoiu seguransa makaas ba iha munisipiu no postu administrativu too eleisaun remata.

Relasiona ho kobertura media, Bernardo M. N. Cardoso konfesa, CNE mos simu rekomendasaun husi observador Uniao Eropeia. Sira husu elisaun tuir mai, presiza koloka jornalista ba fatin sira hotu, inklui suku no aldeia. Realidade seluk mos mosu iha kampanha elpar. Parpol boot sira iha osan, lori jornalista hodi halo kobertura ba sira nia kampaina partidu, entretantu partidu kiik sira laiha osan, labele lori jornalista.

Ho failansu hirak nee, ba oin CNE hakarak hadia no presiza involvimentu jornalista sira, hahu kedas husi resensiamentu eleitoral, kampanha no elisaun, no atu publika rezultadu ikus husi elisaun.

“Kobertura media sira la too iha fat-fatin tanba limitasaun iha rekursu no transporte. CNE mos simu rekomendasaun husi Uniao Eropeia atu tau media ba fatinn sira hotu. Realidade parpol kikoan deit dehan osan laiha maibe partidu boot jornalista tuir sira. Partidu boot iha osan barak beele mundansa iha horas iha junsisipiu iha minute balun iha mundansa,” nia dehan.

Husi Konsellu Imprensa (KI) Hugo da Costa hatete, failansu mosu duni iha tempu kampanha no elisaun jeral 2017. Nee mosu tanba CNE, STAE, no governu lahalo supervizona prosesu nee. I realidadu iha terenu hatudu katak prosesu akreditasaun ba jornalista sira lao oinseluk, no ikus mai halo mudansa ba media sira atu halo kobertura iha fatin elisaun sira.

Iha tempu neeba KI haruka karta dala rua ba CNE no STAE atu fo atorizasaun ba jornalista sira atu vota iha fatin neebe deit. Maibe ikus mai laiha mudansa neebe signifikativu. Tanba nee maka husu ba CNE no Stae atu hadia failansu hirak nee iha periode elisaun tuir mai. Laiha parpol maka halo keixa ba KI konaba jornalista nia atetude konta lei kodiku jornalista no regulamentu elisaun.

“Realidade neebe ami haree iha prosesu elisaun 2017 liu baa mi laiha keixa husi parpol sira konaba atetude jornalista sira kontra kode etika jornalista no regulamentu balun konaba lei sira. Tanba nee moos ami husu ba parte CNE no Stae atu hadia failansu sira neebe mosu iha elisaun nia laran,”nia dehan.

Responsabilidade Radiu Komunidade Eurico Pereira dehan objetivu husi media forum ida nee atu oinsa atu halo revizaun ba kobertura jornalista sira nian iha elisaun jeral 2017 liu ba. Organizasaun Internasional OPC husi Jepan no hetan fundus husi UNDP neebe apoi ba radiu komunidade sira iha munisipiu hotu inklui moos iha Dili.

Tanba nee oportunidade sira nee hetan partesipasaun husi media nasional hanesan radiu, televizaun, media oneline, no media inprimi sira atu hamutuk fo hanoin ba malu oinsa maka hadia elisaun iha tinan lima tuir mai. Atu oinsa maka radiu komunidade sira beele hola parte iha elisaun tuir mai hanesan moos maluk media sira seluk.

“Objetivu husi forum ida nee atu halo revizaun ba jornalista sira nia kobertura durante nee. Nunee moos oinsa maka atu beele fahe esperensia ba malu iha elisaun nia laran atu ba tinan lima mai beele hadia,”nia reforsa tan.

Tuir mai jornal inprimi, eletronika, no oneline hamutuk husu ba STAE no CNE atu fo konfiansa ba KI hodi administra no jere kobertura media iha elisaun, inklui karta akreditasaun. Apiu finansial ba media hotu-hotu iha fatin neebe jornalista sira atu halo kobertura ba.

Husu ba CNE atu servisu hamutuk ho KI hodi fornese formasaun ba partidu politiku sira konaba dezenvolve estratejia kounikasaun partidu nian, nomos oinsa servisu ho media publiku. CNE no STAE atu hametin koperasaun ho instituisaunmedia sira hodi halo preparasaun konaba kobertura elisaun, inklui edukasaun sidadania ba publiku.

CNE no STAE atu fo lisensa ba jornalista sira hodi vota ba fatin neebe deit maka sira halo kobertura ba .atu dezenvolve rekursu humanu ba media hotu-hotu nian, hodi hatene oinsa halo kobertura ho kualidade ba elisaun. Husu ba governu atu fo apoiu orsamentu ba radio komunidade iha munsipiu hotu hodi beele habelar informasaun ba komunidade sira liga ho asuntu elisaun.

CNE, STAE no Radio Publiku atu fo apoiu ba papel radio komunidade hodi fahe informasaun konaba elisaun ho di eduka leitores sira konaba elisaun. Fahe publisiadde ba media hotu hanesan laos deit ba media publiku.

Nunee mos husu ba KI atu halo alfabetizasaun ba media (media literacy-red) ba publiku no politik nain sira. Kontinua sosializa lei komunikasaun sosial, no liberdade imprensa ba publiku. Atu kualia lei konaba media nian hodi kontrola notisia falsu sira neebe publika hosi media oneline.

Halo advokasia lalais ba media sira neebe sira nia redasaun no jornalista halo sala durante elisaun. Atu ativu liu tan halo advokasia ba asesu media ba fontes informasaun, tan jornalista dala darak hetan inpedementu seguransa bainhira hakarak asesu ba fontes informasaun.

Justinho Manuel | Suara Timor Lorosae