Intelektual Konsidera, Karta Xanana Liu Ona Praju

DILI - Intelektuais sira konsidera karta neebe Prezidente Partidu CNRT Xanana Gusmao hatoo ba Mari Alkatiri (atual Primeiru Ministru) espekulasaun deit ba publiku. Sira haree laiha kontiniudu klaru.

Tuir Retor Universidade Dili (Undil) Estevao da Costa Belo neebe hasoru iha ninia knar fatin, Kuarta (6/12/2017), ema seidauk karik kontiniudu karta nee maibe ema hanoin halo espekulasaun liu husi media sosial.

“Ami haree karta Prezidente CNRT Xanana Gusmao ba Mari Alkatiri (atual Primeiru Ministru), ita seidauk hatene ninia kontiniudu. Karik lider rua nee koalia ba malu liu husi telefone maibe ema halo ona espekulasaun liu husi media sosial,”nia dehan.

Zeto Lafralak Patricio (Mate Restu 12 de Novembru) mos dehan, karta Xanana Gusmao ba Mari Alkatiri nee invalidu ona. Tuir informasaun, iha karta nee Xanana Gusmao husu kargu tolu hanesan kargu Ministru Rekurru Minerais, Ministru Finansas, no Ministru Obras Publiku. Tuir lolos karta ida nee bele konsidera atu solusiona problema neebe mosu.

Realidade too agora ita haree, VII Governu Konstituisional (GK) forma no funsiona ona maibe laresponde karta Xanana Gusmao. Parte seluk, karik karta nee responde, oinsa ema neebe naran mensiona iha karta refere bele sai membru governu. Tuir kriteria VII GK nian ka lae. “I tuir hau nia haree, karta nee konsidera invalid ona tanba too agora karta nee seidauk responde. I karik responde, ema neebe naran temi iha karta laran nee, hatama ba membru VII GK, tuir kriteria governu nian ka lae,”nia kestiona.

Diretor Kumpania Nimia Constrution, Lda Epifanio Faculto dehan katak tuir informasaun neebe iha katak karta Maun boot Xanana Gusmao nia nee dirji direitamente ba Sekertariu Jeral Partidu Fretilin no PM atual Mari Alkatiri antes formasaun VII Governu hahu. Karta ida nee entre lider nasional nain rua nee maibe tanbasa mak sai fali husi mediak sosial sia.

Parte seluk moos iha karta Maun Boot Xanana nia neebe diriji direitamente ba Prezidente Republika Francisco Guterres Lu-Olo neebe nia koniudu dehan katak kualia konaba Bloku Opozisaun Parlamentar (BOP). Maibe dejisaun tomak sei tetu hotu iha Prezidente republika tuir konstituisaun.

“Hau haree problema politika neebe akontese, laos ba ekonomia railaran deit. Maibe tuir lolos ita ema Timor oan fo apoiu ba malu atu hakotu ptoblema iha rai laran, selae ho situasaun sira hanesan nee hatauk povu,” nia reforsa. 

Justinho Manuel | Suara Timor Lorosae