Hadi’ak Servisu ADN Alkatiri Hein Xanana

DILI, (TATOLI) - Primeiru Ministru Sétimu Governu Konstitusionál, Mari Alkatiri dehan nia sei hein eis ministru planeamentu investimentu e estratéjiku (MPIE) Kay Rala Xanana Gusmão fila mai Timor mak sira nain rua ko’alia kona ba servisu ADN.

“Uluk ha’u nia mandatu no agora tan maibé orsamentu sempre la iha nafatin maibé ha’u hein maun Boot Kay Rala Xanana Gusmão mai mak ami ko’alia,” Primeiru Ministru informa ba jornalista sira hafoin halo primeira vizita traballu ba edifísiu Ajensia Dezenvolvimentu Nasionál (ADN) Fatu-hada, Dili, Horisehik.

Evita “fakum” iha servisu ADN nian, Xefe governu ne’e sujere atu ADN kontinua halo fiskalizasaun diáriu no periódiku hodi aumenta valor ba kualidade obra.

ADN la bele sente laran taridu tanba Primeiru Ministru sei la muda sistema maibé hakarak hadi’ak liu tan.

“Servisu fiskalizasaun importante maibé ha’u hein Xanana Gusmão fila mak ko’alia tanba ha’u lakohi muda sistema no hakarak hadi’ak di’ak liu tan. Labele konta dehan ADN la loos, lalika laran taridu, rai ne’e la’o di’ak nafatin no joven sira tuur hakmatek, maibé ADN sira tenke servisu nafatin hodi kontrola hahú hosi dezeñu to’o implementasaun projetu,” PM Alkatiri enkoraja.

Iha fatin hanesan Diretór Ajénsia Dezenvolvimentu Nasionál (ADN), Samuel Marçal levanta katak  Rekursu Umanus la sufisiente, inklui orsamentu ne’ebé limitadu halo servisu Ajénsia Dezenvolvimentu Nasionál (ADN) enfrenta problema atu fiskaliza projetu sira.

Daudaun ne’e, Samuel relata katak  rekursu umanu ne’ebé halo fiskalizasaun ba infraestrutura iha munisípiu hotu la sufisiente tanba orsamentu ne’ebé limitadu atu rekruta ema.

“Rekursu umanu iha munisípiu la sufisiente tanba ema nain haat de’it mak dezloka iha munisípiu ida no ida-idak responsabiliza nia servisu mak ida tenke haree ba konstrusaun uma, ida haree ba estrada, ida haree ba irrigasaun no bé,” Samuel Marçal informa ba jornalista sira.

“Ami labele rekruta liu tanba orsamentu la to’o maibé kuandu osan sufisiente ona ita sei rekruta ema ho di’ak atu bele garante servisu fiskalizasaun infraestrutura,” Samuel espera.

Hodi esplika kada tinan orsamentu ba ADN lei la permite atu fó orsamentu boot liu ba ADN maibé só ho osan 1.5 millions de’it atu atende nesesidade operasionál no saláriu.

Entretantu hatán kona ba kapasidade fiskalizasaun, Samuel dehan, Timoroan matenek barak los ona maibé sala mak la aproveita rekursu umanus ne’ebé mak iha hodi kontribui ba prosesu tomak.

“Ita konsultan iha obras públiku nian no iha téknika liña ministeriál hotu maibé ita ladauk utiliza ho di’ak,” Samuel observa.

Obstákulu seluk ne’ebé ADN hasoru mak la iha ekipamentu sufisiente hodi kontrola kualidade obra.

Jornalista: Zezito Silva | Editór: Manuel Pinto