Ró Ida Husi Best Sea Foods Hetan Kaer Husi Indonézia

DILI, (TATOLI) – Ró tolu husi kompañia Best Sea Foods ne’ebé Ministériu Agrikultura no Peska (MAP) fó lisensa atu hala’o atividade peska iha Kosta Súl, ida hetan kaer husi parte Indonézia iha Kupan.

Diretór Jerál Peska, MAP, Acácio Guteres, hatete ró ne’e iha ema hamutuk 21, na’in-sia husi Xina, neen ema Indonézia, tolu Vietname no tolu Miyanmar.

“Timoroan laiha. Agora daudaun ita tenta oinsá atu rezolve, ne’ebé dadus balun ami fó ona informasaun ba Negósiu Estranjeiru oinsá mak bele haree, tanba Indónezia mak konfundi uitoan, sira foti fali área JPDA ne’e sai fali fronteira ne’e mak sai problema no ida ne’e mak sira kaer duni”, Acácio informa iha Komoro, ohin, hafoin halo sorumutuk ho ekipa Ministériu Negósiu Estranjeiru.

Acácio relata bainhira haree husi parte istória, área ne’e tama iha tasi Timor-Leste nian.


“Ohin ami reuniaun ho Negósiu Estranjeiru parte bilaterál nian oinsá mak atu foti desizaun no Ministru Negósiu Estranjeiru mós ba ona Jakarta, aban sei hasoru malu ho Ministru Negósiu Estranjeiru Indonézia nian, ne’ebé informasaun balun ami fó tiha ona ba ekipa tékniku Negósiu Estranjeiru para bele reforsa tan ita-nia ministru atu aban ne’e sira ko’alia”.

Ró ne’e kaer iha parte súl entre Indonézia no Timor-Leste tanba ró patrullamentu Indonézia nia mak tama liu mai iha área ne’e tanba sira konfuzaun ho liña netrál maibé sira foti fali husi área JPDA no lafoti fronteira ne’ebé define uluk.

“Sira lakontra tanba bazeia ba lisensa ne’ebé ita fó no iha lisensa ne’e hakerek katak sira kaer to’o iha área ne’e duni. Só husi Indonézia mak foti fali husi liña JPDA hanesan fronteira fali, la’ós liña fronteira tasi nian”.

“Aban ministru hasoru malu ho Indonézia nian. Sira bá la’ós asuntu peska nian maibé konsidera ho akontesimentu ne’e entaun aproveita tempu para ministru mós hato’o ba ninia omólogu oinsá mak haree ró ne’e nomós ita-nia tripulante sira iha ró leten ne’e bele husik”.

Best Sea Foods ne’e hetan lisensa husi Governu atu halo atividade hakail ikan ita tasi mane no durasaun lisensa ne’e durante tinan ida ne’ebé hahú ona iha abríl 2017.

Jornalista: Maria Auxiliadora | Editora: Rita Almeida

Foto: Ró ida husi kompañia Best Sea Food ne'ebé hetan kaer husi Indonézia. Foto/Google