Lú Olo: Dialogu No Konstitusaun Dalan Solusiona Politika

DILI – Prezidente Republika Francisco Guterres Lú Olo reafirma tan dala ida katak dalan rua deit nia uza hodi solusiona polemika politika neebe dadaun nee lao iha Timor-Leste, maka kontinua mantein dialogu ho lider partidu politiku no ida seluk maka tuir konstitusaun haruka.

Afirmasaun nee hatoo husi Xefe Estadu Francisco Guterres Lú Olo, liu husi nia intervensaun bainhira halao dialogu ho veteranus sira, iha palasiu Prezidensial Nicolau Lobato Birru Pite, Kuarta (6/12/2017).

“Hau sei uza dalan rua hodi solusiona situasaun poltika nee maka uza dialogu ho lider partidu politiku, nunee mos dalan ida seluk maka tuir konstitusaun haruka, neebe hau hateten no hakarak reafirma fila fali hanesan hau dehan hotu no hakarak ohin koalia ida aban mos koalia nafatin hodi labele fo buat neebe ladiak ba povu,” dehan PR Lú Olo.

Nia hateten objetivu konvida veteranus sira atu mai hamutuk ho Prezidente iha palasiu nee, hodi partilla hanoin balun, relasiona situasaun politika neebe lao dadaun, oinsa maka bele buka dalan hamutuk hodi fo apoiu ba malu atu resolve situasaun nee.

Iha fatin hanesan Veteranus Antonio Ai Tahan Matak hateten Prezidente Republika iha obrigasaun boot atu hare hodi solusiona polemika politika, tuir saida maka konstitusaun fo kompetensia ba Prezidente. 

Natalino Costa | Suara Timor Lorosae