Igreja Iha Kbiit Hametin Dame no Pas ba TL

DILI - Igreja nia papel importante laos remata iha 1999 maibe nia kontribuisaun nafatin ba nasaun atu garantia dame, pas no estabilidade iha povu Timor Leste nia leet iha situasaun politika sira.

Lia fuan hirak nee hatoo husi Mate Restu 12 de Novembru Zeto Lafralak Patricio ba STL iha Aimutin Dili Tersa, (05/12/2017). Nia hatutan, instituisaun igreja tenki hatudu nia netralidade no tenki sai moos mediador ba situasaun politika agora. Tanba lideransa nasional sira mesak ema katoliku.

“Tuir hau nia haree katak igreja nudar instituisaun inportante ida, nia beele akomula ema hotu. nunee moos husu atu igreja atu haree nia hirarkia igreja sira atu labele mete politika, maibe diak liu maka sai hanesan mediador ba lideransa nasional, lider partidu politiku sira atu oinsa maka beele kria pas no estabilidade,”nia kualia.

Maibe nudar ema sidadaun, nudar ema katolika fo hanoin deit ba igreja atu tau atensaun ba nia hirarkia igreja nia atu labele mete politika, maibe hanoin oinsa maka hafanu povu atu partisipa iha dezenvolvimentu TL ba futuru.

Observador Politika husi Universidade Timor Lorosae (UNTL) Camilo Ximenes katak separasaun poder laos mai husi orgaun sira maibe inklui moos igreja. Tanba parte igreja kualia kona ba ema nia isin-lolon no ema nia klamar. Igreja mak eduka ema atu sai ema siviku, hanorin respeita ema seluk no respeita ema seluk nia dignidade no opiniaun. 

Justinho Manuel | Suara Timor Lorosae