Nasaun barak apresia evolusaun polítika TL

Ministru Negosiu Estranjeiru no Kooperasaun (MNEK), Aurelio Guterres informa, embaixador haat (4), hanesan Australia, España, India ho Nigeria, apresia evolusaun polítika Timor-Leste (TL), tanba TL hatene jere ninia situasaun polítika rasik.

“Ita hotu hatene katak embaixador haat (4) ne’e hotu-hotu apresia evolusaun polítika iha ita-nia rai laran, mezmu Timor rai ida kiik, implementa valores demókratiku universal iha diverjensia, diferensia opiniaun polítika, maibé iha nivel polítiku de’it, povu kontinua hala’o ninia vida hanesan bai-bain, tanba ne’e sira admira rai ida kiik mas konsege jere ninia situasaun polítika rai laran ho diak,” MNEK ba jornalista sira hafoin partisipa serimonia embaixador husi nasaun haat (4) entrega karta kredensial ba Prezidente Repúblika (PR), Francisco Guterres ‘Lú Olo’, iha Palasiu Prezidensial, Bairo Píte, Díli, Kinta (22-02-2018).

Nia akresenta, nasaun haat (4) ne’e dezeja no fiar katak Timor-Leste sei ultrapasa mós Eleisaun Antesipada no sei iha tan Governu no Parlamentu foun.

“Embaixadores husi paizes haat (4) mai entrega kredensiais nomeadamente husi Australia, España, India ho Nigeria ho ninia objetivu atu kontinua hametin relasaun ho Timor-Leste, espesífikamente iha area kooperasaun sira ne’ebé Timor-Leste ho nasaun sira ne’e presiza atu halo,” relata Aurelio Guterres.

Nia haktuir, Australia ho TL halo kooperasaun iha edukasaun, seguransa no defeza, ekonómia no formasaun no kapasitasaun ba públiku no servidor Estadu, bolsu estudu ba Australia. Alende ne’e mós oras ne’e dau-dauk Australia no TL iha hela prosesu atu finaliza problema Fronteira Marítima.

“Ho España ninia kooperasaun barak liu fokus ba nivel rejional ho Uniaun Europeia, ho India ita-nia kooperasaun barak liu kona-bá seitor edukasaun, formasaun tékniku ba Timoroan no funsionariu sira. Kooperasaun ho Nigeria polítikamente sira sempre apoiu ita antes independensia to’o agora, sira mós buka para oinsa maka bele estabelese kooperasaun iha parte téknika balun,” hateten MNEK ne’e.

Embaixador haat (4) ne’e husi Australia maka Peter Roberts, José Maria Matres husi España, india maka Pradeep Kumar Rawat no husi Nigeria maka Hakeem Toyin Balogun.

Entretantu antes ne’e mós PR Lú Olo simu ona karta kredensial husi embaixador Filipina, Kolombia, Franca, America, Portugal no Korea do Sul. ves

GMN TV | Grupo Média Nacional