Austrália konfirma entrega ró rua patrulla nian ba Timor-Leste iha tinan 2023

Governu australianu konfirma ona katak ró patrulla marítima rua ne'ebé oferese ba Timor-Leste iha ámbitu hosi programa ida apoiu rejional nian sei entrega ba Governu timoroan iha tinan 2023, haktuir hosi komunikadu ofisial. 

Ministériu sira Defeza ho Indústria Defeza nian esplika liuhosi komunikadu hamutuk katak entrega ró rua ne'e ba Timor-Leste halo parte hosi "kompromisu maka'as hosi Austrália ho seguransa marítima rejional".

Marise Payne, ministra Defeza australianu nian, hatete katak oferta australianu ba ró rua sei ajuda Timor-Leste hodi reforsa nia kapasidade sira hodi fahe nia fronteira marítima sira no ba protesaun hosi nia rekursu natural sira.

Iha fulan-Novembru tinan liubá, primeiru-ministru australianu, Malcolm Turnbull, anunsia ona katak Timor-Leste aseita oferta ida hosi Canberra ba ró rua hodi halo patrulla iha tasi timoroan sira nian.

Anúnsiu ne'e halo durante jantar gala ida hosi Konferénsia Rejional Ázia ho Pasífiu nian ne'ebé hala'o iha Perth, iha Austrália Osidental, ne'ebé partisipa hosi primeiru-ministru timoroan, Mari Alkatiri.

"Ró sira sei hanesan soberania Timor-Leste nian, ho asisténsia, manutensaun ho apoiu australianu", Payne hatete no repete katak kompromisu apoiu nian sei dura tinan 30.

Folin total hosi pakote apoiu nian, inklui ró sira ho manutensaun durante tinan 30 nia laran, maka besik dolar australianu millaun 300.

"Hanesan pakote ida asisténsia nian ne'ebé iha baze hosi ami nia koperasaun ne'ebé iha ona iha área seguransa marítimu ho Timor-Leste, hanesan parte hosi ami nia programa bilateral iha área defeza nian", nia subliña.

Christopher Pyne, ministru Indústria Defeza nian, hatete katak Austrália ho Timor-Leste sei ko'alia nafatin "pakote boot ida ba apoiu interinu hosi formasaun no sustentabilidade hodi ajuda halo administrasaun ba transferénsia sira hosi ró sira nian ba Timor-Leste".

Ró sira halo hela hosi empreza Austal, iha ámbitu hosi Programa Seguransa Marítimu Pasífiku nian (PMSC, iha lian inglés), hosi Governu australianu.

Mick Rozzoli, adidu hosi Defeza iha embaixada australianu iha Díli, esplika ona ba Lusa iha fulan-Novembru katak asuntu ne'e halo parte iha ajenda bilateral dezde tinan 2013 bainhira Timor-Leste halo uluk kontaktu ho Austrália kona-ba posibilidade hodi halo parte iha Programa Ró sira Patrulla nian iha Pasífiku (PPBP, iha lian inglés).

Programa ne'e, substitui ona iha tinan 2014 ho PMSC, permiti fó ró patrulla hamutuk 22 ba nasaun benefisiáriu sira hamutuk 13, nasaun sira hosi rejiaun Pasífiku nian.

Sentral iha relasionamentu iha área defeza hosi Austrália nian iha rejiaun no ne'ebé hala'o dezde tinan 2014, PMSC haree ba doasaun to'o ró patrulla nian hamutuk 21 ne'ebé sei troka ró hamutuk 22 ne'ebé fó ona ba nasaun sira ne'e entre tinan 1987 no 1997, asaun dahuluk ne'ebé maka tuir loloos sei entrega iha fulan-Outubru 2018.

Aleinde fó ró sira, programa haree mós ba apoiu iha formasaun to'o tripulasaun na'in tolu - ró ida-idak bele iha elementu to'o na'in 23 - no manutensaun durante tinan 30 nia laran.

SAPO TL ho Lusa