Hahú dezenvolve ona serbisu bankáriu móvel dahuluk iha Timor-Leste

IFC, ne'ebé halo parte iha Banku Mundial, ho KIF, instituisaun finanseiru dahuluk ne'ebé la'ós hanesan banku iha Timor-Leste, fó sai ona iha loron-kuarta ne'e akordu ida hodi dezenvolve serbisu bankáriu móvel dahuluk iha nasaun, ne'ebé hein katak sei to'o ba ema rihun 50.

Iha komunikadu, International Finance Corporation (IFC) esplika ona katak projetu dezenvolve hamutuk ho Kaebauk Investimentu no Finansas (KIF) hakarak haree, liuliu, ba populasaun sira iha zona rural sira ne'ebé dalabarak laiha asesu ba serbisu finanseiru báziku sira.

Objetivu maka atu populasaun ne'e maski laiha ligasaun ruma ba banku sira bele iha alternativu hodi poupa, haruka ka simu osan, esplika hosi IFC, ne'ebé serbisu nafatin hodi kria oportunidade hosi serbisu bankáriu móvel sira iha merkadu sira iha mundu tomak.

"Parseria sei permiti ba KIF hodi lansa operasaun bankáriu móvel sira no lahó ajénsia no hatama 'Kaebauk Osan', produtu ida poupansa nian ne'ebé hakarak fornese serbisu finanseiru ba populasaun rural sira no populasaun urbanu kiak sira, ho foku espesial iha feto sira no iha aumentu hosi agronegósiu Timor-Leste nian ho oportunidade finanseiru sira ba agrikultor rural sira hamutuk 10.000", hatete hosi responsável sira projetu nian.

Ba Azam Khan, responsável hosi IFC ba Indonézia, Malázia ho Timor-Leste, hanesan programa ida ne'ebé bele tulun diversifika ekonomia timoroan nian.

"Timor iha populasaun ne'ebé joven tebes, liu 50% hosi populasaun seidauk iha tinan 20, barak liu sei tama iha merkadu serbisu nian iha tinan hirak tuirmai", nia afirma.

"Projetu ne'e oferese dalan ida ba ema timoroan tomak hodi kaer di'ak osan no bele serve hanesan odamatan hodi tama ba serbisu finanseiru sira seluk, ajuda, iha análize ikus, aumenta ekonomia", nia subliña.

Angelo Soares, responsável KIF nian, destaka ona katak kuaze 65% hosi populasaun timoroan envolve iha área agríkola, ne'ebé hanesan fonte maka'as ida hosi empregu iha área rural sira.

"KIF kompromete hodi promove inkluzaun finanseiru iha fatin rural sira nasaun nian hodi promove sustentu hosi populasaun sira. Ita hatene katak ema sira iha área rural sira hakarak asesu ba produtu sira poupansa nian no hakarak iha asesu ba serbisu finanseiru sira ho fasilidade", nia afirma.

KIF lansa iha tinan 2001 hodi fornese produtu finanseiru sira ba populasaun rural sira ho urbanu sira ne'ebé kiak, agora daudaun halo operasaun iha filial hamutuk 20 iha nasaun laran, ho kliente hamutuk 12.462 no karteira empréstimu ida hamutuk dolar millaun 15.

IFC hanesan organizasaun irmaun ida hosi Banku Mundial no membru hosi Grupu Banku Mundial no instituisaun boot hosi dezenvolvimentu global ne'ebé haree ba área privadu iha merkadu foun sira.

Agora daudaun serbisu ho empreza hamutuk rihun rua resin iha mundu tomak, no iha pasadu fó ona dolar biliaun 19,3 iha finansiamentu ho prazu naruk ba nasaun sira iha dezenvolvimentu.

SAPO TL ho Lusa