quinta-feira, 19 de abril de 2018

Rui Maria de Araújo repete katak "firmi" iha partidu Fretilin

PARTILHAR

Eis-primeiru-ministru timoroan Rui Maria de Araújo garanti ona, iha loron-kuarta ne'e, katak "mantén firmi" iha fileira Fretilin nian (iha poder), maski agradese kumprimentus sira hosi Xanana Gusmão, líder hosi opozisaun ne'ebé maka nia halo ona parte iha Governu ida.

"Ha'u senti honradu no to'o pontu ida orgullu tanba kumprimentu sira hosi líder nasional ida, ne'ebé maka ha'u la merese. Maibé líder nasional koñese ha'u di'ak tebes no hatene katak ha'u la'ós ema ne'ebé maka muda beibeik", nia hatete ba Lusa.

Rui Araújo nia komentáriu sira mosu hafoin deklarasaun sira hosi primeiru-ministru anterior no prezidente atual hosi Aliansa Mudansa ba Progresu (AMP), Xanana Gusmão, ne'ebé durante kampaña felisita mane ne'ebé nia hili hodi troka nia iha lideransa Governu nian iha tinan 2015.

Iha komísiu ida, ne'ebé halo iha semana liubá, Xanana Gusmão "piska matan" ba Rui Araújo, ema ne'ebé maka nia hatete hanesan "hanoin barak", tanba konsidera katak "iha tahu nia laran" iha nia partidu laran, Frente Revolucionária do Timor-Leste Independente (Fretilin).

"Ha'u hanoin beibeik iha irmaun Rui Araújo. Rui, sai hosi tahu-laran. Sai hosi sira ne'ebé hanesan aat. Sira hatama ó iha tahu no ó presiza sai. Ha'u hadomi tebes ita nia irmaun ne'. Nia presiza hamriik metin", Xanana afirma durante komísiu.

Deklarasaun sira hamosu sujestaun katak Rui Araújo bele hakarak hadook hosi Fretilin no hakbesik ba AMP.

"Xanana Gusmão ho sekretáriu-jeral Fretilin nian koñese di'ak ha'u no hatete katak ha'u la'ós ema ne'ebé maka muda lalais. Ha'u iha nafatin fileira Fretilin nian, ha'u hili hodi sai ona militante Fretilin nian hodi serbi povu, hodi dedika ba públiku nia di'ak no ha'u sei kontinua nafatin iha ne'e", deklara hosi Rui Maria de Araújo.

Iha inísiu 2015, Xanana Gusmão demiti hosi kargu primeiru-ministru hosi Governu dalima no konvida ona Rui Maria de Araújo hodi halo parte iha ezekutivu, lidera hosi Congresso Nacional da Reconstrução Timorense (CNRT), hosi membru oioin Fretilin nian, inklui Rui Araújo.

Araújo simu pose nu'udar primeiru-ministru, iha ezekutivu ida ne'ebé Xanana Gusmão kaer knaar ba Planeamentu ho Investimentu Estratéjiku, iha períudu ida ho relasionamentu di'ak entre líder istóriku timoroan ho Fretilin.

Iha lejislativu fulan-Jullu iha tinan liubá, Fretilin halakon CNRT, ho diferensa ki'ik ida, no harii ona Governu minoritáriu ida ho Partidu Demokrátiku (PD) ho ema independente oioin.

Antes, Xanana Gusmão deklara ona katak CNRT sei hanesan opozisaun, maibé hafoin ne'e partidu halibur hamutuk ho forsa opozisaun rua seluk, Partidu Libertasaun Popular (PLP) hosi Taur Matan Ruak nian no Kmanek Haburas Unidade Nacional Timor Oan (KHUNTO) de José Naimori, hodi harii AMP, ne'ebé aprezenta ona hanesan alternativu Governu nian.

Divizaun hahú ho problema polítiku ida ne'ebé halo Prezidente Timor-Leste, Francisco Guterres Lu-Olo, sobu parlamentu ho konvoka eleisaun antesipadu. Kampaña hala'o to'o loron 09 Maiu no votu akontese iha loron 12 Maiu.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: