Kandidatu Traballadór Korea 619 Teste Nani Tasi

DILI, (TATOLI) – Sekretáriu Estadu Juventude no Traballu (SEJT) hamutuk ho Unidade Polísia Marítima (UPM) hala’o teste nani tasi ba kandidatu traballadór Korea hamutuk 619 atu bá serbisu iha área peska ho kualidade no  prontu hala’o knaar.

Prova ne’e fó husi instrutór UPM hamutuk 25 ho nani kuaze métru 50 ne’ebé hala’o iha tasi Lesidere.

SEJT, Nívio Leite Magalhães, hatete antes tama tasi fahe tiha kandidatu sira ne’e ba grupu tolu mak ida hatene nani, hatene natoon de’it no lahatene liu.

“Ba sira ne’ebé lahatene nani sei iha mós formasaun ba sira, nune’e bele prepara sira di’ak liután”, Nívio hatete iha Lesidere, ohin.

Objetivu husi teste ne’e atubele hili traballadór ne’ebé ho kualidade di’ak, prontu atu bá serbisu iha área peska mak bele bá, tanba halo knaar iha tasi ne’e risku no bá sira ne’ebé atu sai bá rai-liur ne’e klaru katak família no Nasaun hein hela atu fila.

“Ita lakohi atu sira hetan asidente ba sira-nia moris, tanba ne’e mak presiza prepara sira didi’ak nomós sira ne’ebé iha kualidade duni no prontu atu serbisu”.

“Se ita naran hili no haruka bá de’it to’o ikus vítima ne’e traballadór sira. Bainhira sira bá serbisu iha ró laran sé lapreparadu bele abandona serbisu. Bainhira abandona ema sei latemi naran maibé Timor-Leste no ita hotu hanesan timoroan tenke dignifika no tane aas ita-nia nasaun iha nasaun seluk, tanba ne’e presiza tebes atu prepara”.

Komandante UPM, Lino da Silva Saldanha, dehan prontu atu fó apoiu ba SEJT tanba programa ne’e di’ak atu lori timoroan bá oin ho kualidade ne’ebé laiha intensaun diskrimina no  nepotizmu.

“Ami ejize de’it mak mak imi ne’ebé bá tenke prepara didi’ak atubele foti nasaun ne’e”.

Lino da Silva hatutan kooperasaun entre SEJT no UMP ne’e foin ba dahuluk, nune’e husu instrutór sira atu hatudu ida ne’ebé di’ak ba povu no na’i-ulun sira atuble fó konfiansa. “Ita ne’e profisionál duni ka la’e atu forma ita-boot sira (kandidatu traballadór iha peska nian)”.

“Tasi ho rai-maran lahanesan, tasi nia risku boot, tanba ne’e mak ha’u ejize imi hotu tenke iha responsabilidade ba imi-nia aan, família no nasaun, tenke iha disiplina, badinas iha fatin ne’ebé imi atu serbisu ba, tenke iha abilidade buka atu aprende saida mak seidauk hatene, tenke iha morál, morál laiha laserve atu sai traballadór di’ak no ikus tenke intelijente atu bá na’ok ema nia matenek”.

Nune’e husu kandidatu sira atu halo tuir instrutór sira-nia haruka no ba sira ne’ebé laliu sei halo formasaun ketak ida.

“Ha’u orgullu no agredese tebes ba serbisu hamutuk ida ne’e, husi juventude no traballu fó fiar mai ami no ida ne’e grasa boot ida Maromak nian tanba ita bele halo ema atus-neen-resin bele bá rai-liur, tuir formasaun ida di’ak hodi lori sira-nia família ba moris di’ak. Serbisu ida agora ita halo ne’e ita tula liman ba malu, la’ós ami no imi de’it mak halo di’ak maibé ita hotu tenke halo di’ak para foti ita-nia rai”.

Xede Departamentu Overseas, SEJT, Belarmino da Cruz, hatete kandidatu traballadór ne’e 2017 nian no bazea ba kuota husi Korea ba área peska hamutuk 900 mas selesaun ne’ebé iha ema 619 mak liu.

Jornalista: Maria Auxiliadora | Editora: Rita Almeida

Imajen: Kandidatu traballadór Korea hamutuk 619 simu teste hosi UPM iha Lecidere, ohin. Foto Tatoli/Maria Auxiliadora