Akta Bobonaru, Ida Iha Problema

DILI, (TATOLI) - Prezidente Komisaun Nasionál Eleisaun (CNE-Sigla Portugés), Alcino Barris husu ba Tribunál Rekursu atu autoriza Komisaun Nasionál Eleisaun (CNE-sigla Portugés) hodi loke akta ida ne’ebé mai hosi Munisípiu Bobonaru tanba sei iha problema nia laran.

“Bobonaru iha akta ida, ida ne’e mak iha problema, tanba ne’e ami husu ba Tribunál Rekursu atu autoriza ami hodi loke akta ne’e tanba ami simu ona hosi STAE (Sekretariadu Téknika Administrasaun Eleitoral),” Prezidente CNE, Alcino Barris ba jornalista sira iha Kaikoli hafoin halo abertura ba apuramentu nasionál iha Kaikoli, ohin.

Nia hatutan bainhira Tribunál autoriza ona CNE sei loke akta refere iha públiku nia oin. Hodi buka identifika ho meius konta fali votus hosi akta ne’e nian, tanba iha prosesu kontajen ne’ebé mak halo ona no partisipa hosi fiskais partidu no STAE votu barak liu tiha iha sentru votasaun ida nune’e bainhira soma hamutuk implika ba númeru. Ho ida ne’e mak STAE deside lori direita mai CNE hodi toma medida konforme lei haruka.

Enkuantu total akta ne’ebé STAE entrega ona ba CNE hamutuk 885, dizita ona 884, seidauk dizita (reklamadu) akta ida.

Ho ida ne’e lori CNE nia naran, Alcino husu ba fiskais partidu hotu, observadór nasionál no internasionál inklui mídia atu akompaña prosesu apuramentu nasionál tomak durante 72 oras.

CNE sei utiliza sistema dijitál ho maneira hatama akta orijinál ne’ebé mai hoai sentru votasaun hotu, iha prosesu verifikasaun, hafoin ne’e halo deliberasaun hodi submete ba tribunál atu valida no pronúnsia rezultadu ikus, eleisaun antisipada nian.

Entretantu too notísia ne’e hatún seidauk iha konfirmasaun hosi parte tribunál ba pedidu hosi CNE nian.

Jornalista: Zezito Silva | Editór: Manuel Pinto

Imajen: Prezidente Komisaun Nasionál Eleisaun (CNE-Sigla Portugés), Alcino Barris.