Lider AMP Hato’o Parabéns Ba Povu

DILI, (TATOLI) – Lider másimu Aliansa Mudansa ba Progresu (AMP), Kay Rala Xanana Gusmão, hato’o parabéns ba povu ne’ebé partisipa ona Eleisaun Antesipada (EA) no entidade relevante sira ne’ebé kontribui iha prosesu.

“AMP hato’o parabéns ba povu tomak”, kongratula Xanana Gusmão liuhusi konferénsia imprensa iha sede AMP Bairru Grilhos, ohin.

Xanana hato’o parabéns iha sentidu povu konsege partisipa, buka haka’as án atu tau votu konfiansa ba partidu sira ne’ebé konkore.

Nune’e mós hatudu iha prosesu konstrusaun Estadu, povu mós preparadu atu simu dezafiu, difikuldade ho esperansa katak bele hadi’a situasaun.

Xanana mós fó apresiasaun ba maturidade polítika populasaun hodi konsidera nu’udar orgullu. “Ha’u konfiante tebes katak ita iha grupu ida G7+ sei aprende tebes husi ita-nia kbiit atu rezolve problema, ultrapasa problema hodi haree ba oin”.

“Ida ne’e mak diresaun AMP labele husik oportunidade ida ne’e hodi hato’o liafuan apresu ruma”, akresenta.

Eis Prezidente Repúblika ne’e mós fó apresiasaun ba Polísia Nasionál Timor-Leste (PNTL) no FALINTIL-Forsa Defesa Timor-Leste (F-FDTL) tan hala’o esforsu.

“Seguransa iha momentu konkretu sira hanesan ne’e, la’ós de’it iha eleisaun antesipada maibé mós iha prosesu kampaña tomak, ami haree, ami verifika duni esforsu boot tebes husi forsa seguransa, liliu PNTL ho F-FDTL”, dehan Xanana.

Hato’o mós parabéns ba fiskais AMP nian to’o estasaun votu hothotu. “Ami prepara sira ulun fatuk moras uitoan mas to’o estasaun votu, hothotu iha estasaun votu, sira responde duni konfiansa ne’ebé fó ba sira”.

Agradese nomós parabéns ba koordenadór fiskais iha teritóriu. “Nune’e mós hato’o parabéns ba kuadru no militante ne’ebé responde ho di’ak tebes, la’ós durante kampaña tomak maibé mós iha loron votu”, kongratula.

Jornalista: Rafy Belo | Editora: Rita Almeida

Lideransa koligasaun Aliansa Mudansa ba Progresu (AMP) halo konferénsia imprensa iha sede AMP Bairru Grilos, ohin. Foto Egas Cristovão