DILI, (TATOLI) – Lider
másimu Aliansa Mudansa ba Progresu (AMP), Kay Rala Xanana Gusmão, konsidera
Francisco Guterres Lú Olo nu’udar Prezidente Repúblika ba povu tomak la’ós ba
partidu polítiku.
“Orsamentu ba, lei ruma ba, atu
veta tenke iha razaun, tenke aprezenta fundamentu legál (viola konstituisaun,
viola lei ruma), fundamentu polítiku, tanbasá”, dehan Kay Rala Xanana Gusmão
iha konferénsia imprensa ne’ebé hala’o iha sede AMP, Bairru Grilhos, ohin.
Xanana husu hatudu kualidade
nu’udar Prezidente Repúblika katak prezidente ba Timor-Leste.
“Nia (Lú-Olo) labele hatudu
frakeza atu rona tuir fali FRETILIN (Frente Revolusionária Timor-Leste
Independente) hanesan nia funsiona nafatin nu’udar prezidente partidu FRETILIN.
Ne’e ami la aseita”, Xanana akresenta.
Eis Primeiru-Ministru ne’e
reforsa hodi husu kuandu veta proposta lei ruma tenke aprejenta razaun
fundamentál.
“Aprezenta kestaun legál,
tanbasá, viola saida”, afirma.
Xanana salienta Nasaun ne’e
adopta sistema prezidensiál, tanba ne’e, sidadaun ne’ebé hetan konfiansa husi
povu hodi asume kna’ar nu’udar PR, prezidente ba ema hotu, la’ós ba partidu.
“Dalaruma ita nu’udar umanu, ita
bele monu ba tentasaun”, subliña.
Jornalista: Rafy Belo | Editora:
Rita Almeida
Imajen: Prezidente partidu
koligasaun Aliansa Mudansa ba Progresu (AMP), Kay Rala Xanana Gusmão, bainhira
halo mensajen ba militante, simpatizante no apoiante AMP liuhosi konferénsia
imprensa iha sede AMP Bairru Grilos, ohin. Foto Egas Cristovão
Sem comentários:
Enviar um comentário