segunda-feira, 7 de maio de 2018

STAE Identifika Laiha Manipulasaun Bulletin Votus Iha Kovalima

PARTILHAR

DILI, (TATOLI) – Diretór Jerál Sekretariadu Tékniku Administrasaun Eleitorál (STAE), Acilino Manuel Branco dehan, informasaun espalla iha sosiál media ne’ebé hateten katak iha manipulasaun bulletin votus iha sentru votasaun ida, iha munisípiu Kovalima, “ne’e la los”.

“Iha verifikasaun deskobre duni katak iha livru ida, tahan ida ka rua fo’er maibé la’ós livru tomak iha sinál ka kuak refere ba partidu ka koligasaun ida, tanba ne’e informasaun ida ne’ebé espalla kompletamente la loos”, Acilino Manuel Branco esplika iha konferénsia imprensa ohin.

Nia dehan, issue manipulasaun votus ne’e la’ós buat foun iha eleisaun, maibé tanba situasaun agora bele halo ema entrepeta oin-oin.

STAE halo ona verifikasaun, bulletin votus sira ne’ebé fo’er iha munisípiu balun, sira konkorda katak la presiza transporta ba sentru votasaun, maibé tau de’it karimbu la uza/canceladu, para dehan bulletin ida ne’e la uza ona, para nune’e aban bain rua bulletin sira labele uza tan iha prosesu votasaun.

Hafoin tau karimbu “la uza”, sei tau akta ida atu hatete katak iha períodu verifikasaun ne’e, bulletin votus hirak mak hetan situasaun ne’e, serial hira no aprova husi Diretór STAE munisípiu hira ninia ho reprezentasaun husi CNE no sasin husi fiskais no partidu polítiku no koligasaun hotu nó mós husi parte komandu PNTL nia reprezentante iha sentru verifikasaun.

Ba kazu Kovalima nian, komprova bulletin la kuak maibé, fo’er ho tinta tanba prosesu impresaun ho mákina ne’ebé mak boot no tenke imprime ho kuantidade ne’ebé mak barak dala ruma tinta nia been bele haksoit no belit iha bulletin sira balun.

Entretantu, STAE distribui ona material sensitivu ba munisípiu 12 inklui Rejiaun Administrativu Espesiál Oekusi Ambenu (RAEOA) no Diaspora atu sidadaun sira bele ezerse sira nia direitu iha Eleisaun Antisipada iha loron 12 Maiu.

Dadus husi STAE hatudu katak iha eleisaun ida ne’e rejista ona 784.286 eleitores no sentru votasaun 885 ne’ebé espalla iha territóriu no Diaspora ho estasaun votu 1160.

Jornalista: Julia Chatarina | Editór: Manuel Pinto

Imajen: Diretór Jeral Sekretariadu Tékniku Administrasaun Eleitoral (STAE), Acilino Branco halo konferensia imprensa ohin hodi klarifika informasaun konaba manipulasaun buletin votu ne'e la los. Imajen Tatoli/Egas Cristovão
PARTILHAR

Author: verified_user

Publicação luso-timorense sem fins lucrativos

0 comentários: