terça-feira, 5 de junho de 2018

FDD Mantein Opozisaun Konstrutiva

PARTILHAR

DILI, (TATOLI) - Frente Dezenvolvimentu Demokrátiku (FDD) nia postura polítika iha Parlamentu Nasionál sai opozisaun konstrutiva no edukativa.

Kestaun ne’e hato’o hosi Prezidente Komisaun Polítika FDD, Agostinho Gomes ba jornalista sira iha Palásiu Prezidente Nicolau Lobato, Bairru Pité, Dili, segunda ne’e, hafoin soru-mutu ho Prezidente Repúblika, Francisco Guterres Lú Olo, kona-ba pozisaun FDD pós eleisaun antesipada.

Gomes esplika programa Governu ne’ebé haree liu-ba interese povu kiik sira, FDD sei vota apoiu ba programa ne’e.

“Konstrutiva no edukativa signifika katak programa Governu ne’ebé maka pro povu kiik sira, ami sei vota afavór. Programa sira ne’ebé mai la’ós pro povu, ami sei vota kontra tanba ami mós iha postura polítika no ami mós iha programa rasik ne’ebé defende povu kiik no kiak sira,” líder FDD ne’e afirma.

Nia konsiente katak FDD ne’e partidu ki’ik no hetan de’it kadeira tolu, ne’e duni, partidu sira ne’ebé iha pozisaun iha Governu ne’e la presiza.

“Ko’alia kona-ba insidénsia parlamentár ne’e só ko’alia ho partidu boot hanesan FRETILIN ne’e bele, maibé kuitadu, ami ne’e partidu ki’ik entaun defisil halo ida ne’e,” Gomes argumenta.

Jornalista: Xisto Freitas | Editór: Manuel Pinto

Imajen: Estrutura FDD dadalia ho jornalista sira hafoin hala'o enkontru ho Prezidente Repúblika, segunda lokraik ne'e. Imajen Ajénsia Tatoli/Xisto Freitas.
PARTILHAR

Author: verified_user

Publicação luso-timorense sem fins lucrativos

0 comentários: