terça-feira, 5 de junho de 2018

Postura Polítika PD La’ós Insidénsia Parlamentár


DILI, (TATOLI) - Prezidente Partidu Demokrátiku (PD), Mariano Sabino “Assanami” informa PD nia postura polítika atuál iha Parlamentu Nasionál la’ós insidénsia Parlamentár maibé opozisaun.

Tanba ne’e, Assanami  husu ba partidu sira ne’ebé maka hola parte iha Governu maka tenke jere sira nia polítika halo didi’ak.

“Liuhusi konferénsia ne’ebé PD halo tiha ona, konfresista sira husu ba líder PD atu kontinua jere PD iha Parlamentu Nasionál nomós iha liur nu’udar “PD ba Estadu” atu oinsá maka bele serbí nasaun ida ne’e,” nia dehan lia hirak ne’e ba jornalista sira iha Palásiu Nicolau Lobato, Bairru Pité, Dili, segunda ne’e, hafoin enkontru ho Prezidente Repúblika, Francisco Guterres Lú Olo, kona-ba pozisaun PD nu’udar partidu opozisaun iha Parlamentu Nasionál.

Nia esplika, lema “PD ba Estadu” signifika katak saida maka di’ak ba povu PD fó apoiu maibé sempre krítiku no sempre analiza ne’ebé kle’an ho baze jestaun efisiénsia no efikáz ba Estadu nia osan.

Nia hatutan bainhira buat ne’ebé maka Oitavu Governu aprezenta la refleta ba povu nia nesesidade, PD sei vota kontra.

Iha biban ne’e, Assanami louva Prezidente Repúblika nia esforsu durante ne’e ne’ebé sempre konvida partidu polítiku sira ne’ebé hetan asentu iha Parlamentu Nasionál hodi husu opiniaun kona-ba asuntu Estadu.

Jornalista: Xisto Freitas | Editór: Manuel Pinto

Imajen: Prezidente PD, Mariano Sabino "Assanami" ko'alia ba jornalista sira kona-ba objetivu enkontru ho Prezidente Repúblika, ohin. Imajen Ajénsia Tatoli/Xisto Freitas.

Sem comentários: