quinta-feira, 26 de julho de 2018

Deputadu FRETILIN Kestiona Promesa Eleitorál AMP Atu Dada Kadoras

PARTILHAR

DILI, (TATOLI) – Deputadu hosi bankada Frente Revolusionária Timor-Leste Independente (FRETILIN), Antoninho Bianco, kestiona promesa eleitorál koligasaun partidária Aliansa Mudansa ba Progressu (AMP) ne’ebé agora dadauk forma bankada CNRT, PLP no KHUNTO, hato’o durante kampaña katak kuandu manan iha eleisaun antesipada, sei dada kadoras Greater Sunrise (pipe line) mai Timor-Leste.

“Iha indústria mina ne’e, kampaña AMP koa’lia atu dada kadoras mai iha fatin hotu-hotu, ne’ebé povu mós fiar katak molok Bayu Undan atu hotu iha tinan 2022, kadoras mai duni, tanba ne’e votu hetan duni no AMP manan duni”, tenik iha nia intervensaun loron dahuluk debata programa VIII Governu Konstitusionál iha plenária.

Liuhosi debate programa governu, deputadu opozisaun ne’e husu Primeiru-Ministru (PM), Taur Matan Ruak, atu hatan ba povu durante tinan lima governasaun AMP ne’e kadoras atu mai ona ka seidauk.

“Hau hare inserteza iha programa, se kadoras la mai, oinsá mak hatama reseita ba rai ne’e, se indústria turizmu ne’ebé dehan atu lori mai turizta 450.000 mós inserteza, ida ne’e povu tenke hatene, tamba ita koa’lia iha povu no povu tenke rona”, katak.

Hatan ba kestaun ne’e, PM hateten sei kadoras la mai iha governasaun ne’ebé nia lidera, entaun sei mai iha governasaun tuir mai.

“Se la mai ha’u nia tempu, sei mai iha governu tuir mai, mas Sunrise tenke mai, tanba ne’e nesesidade ida atu reforsa ita nia ekonomia no fó empregu ba ita nia ema sira”, tenik.

Xefe Governu hatutan alende ida ne’e bele hetan fundus para bele aumenta rekursu finanseiru, hodi sustenta ita nia nasaun iha tempu hirak tuir mai.

“Tanba ne’e hanesan objetivu ida, no ha’u fiar laiha buat ida mak impossibel iha mundu, mesmu ida ne’ebé ita lori mate mak sosa bele, tanba saida mak ida ne’ebé lori ita nia vontade no pasiensia de’it ita labele”, argumenta.

Jornalista: Julia Chatarina | Editora: Rita Almeida

Imajen: Antoninho Bianco, iha RTTL
PARTILHAR

Author: verified_user

Publicação luso-timorense sem fins lucrativos

0 comentários: