Governu Sei Kria Kampu Traballu Rihun 60

DILI, (TATOLI) - Governu Konstitusionál Da-Ualu, ne’ebé lidera husi Primeiru-ministru, Taur Matan Ruak, iha nia polítika makroekonómika, sei kria kampu traballu rihun 60 ba ema hotu, liuliu joven no moris di’ak populasaun sira nian.

“Tanba ne’e governu iha alvu, kria mínimu kampu traballu rihun 60 foun, no mantein taxa dezempregu iha díjitu ida de’it, hamenus taxa dezempregu ba pursentu 10,” deklara primeiru-ministru, Taur Matan Ruak, iha Parlamentu Nasionál, iha ámbitu aprezentasaun programa, ohin.

Taur akresenta atu atinje objetivu hirak ne’e, polítika makroekonómika sei orienta liu ba dezenvolvimentu ekonómiku iha kreximentu ne’ebé mak aas, inkluzivu no sustentável, iha diversifikasaun ekonomia liuhusi dezenvolvimentu setór produtivu sira (agrikultura, turizmu, petróleu no indústria manufacturer), iha promosaun investimentu setór privadu, hodi fortaleza sustentabilidade fiskál no dezenvolve indústria finanseira.

Durante tinan lima tuir mai, governu hakarak atinje média kreximentu ekonómiku ida liu porsentu hitu, ho kontribuisaun elevada husi setór privadu iha setór produtivu sira.

“Governu sei kria kondisaun hodi aumenta investimentu setór privadu nian iha mínimu porsentu 10 kada tinan, hodi kontribui ba diversifikasaun ekonomia, nune’e mós aumenta baze impostu, hodi viabiliza objetivu sustentabilidade fiskál, no kontribui ba dezenvolvimentu inkluzivu no sustentável,” esplika xefe ezekutivu ne’e.

Primeiru-ministru mós perante deputadu sira informa katak governu sei dezenvolve, ba dahuluk, infraestrutura sira, rekursu umanu no reforsa instituisaun públika sira. “Enkuantu pré-kondisaun hodi estimula dezenvolvimentu setór sira seluk nian, governu sei kontinua dezenvolve infraestrutura sira ho objetivu atu fó suporte ba kreximentu ekonómiku no fortaleza produtividade no konektividade,” kompromete Primeiru-ministru, Taur Matan Ruak.

Ba polítika monetária governu konstitusionál da-ualu nian mak preparasaun moeda tanba moeda nu’udar instrumentu finanseiru ne’ebé asume papél importante iha dezenvolvimentu país ida nian, liuliu iha dezempeñu valór moeda ne’ebé mak Timor-Leste uza ho moeda sira seluk.

“Governu liuhusi Ministériu Finansa sei hamutuk ho Banku Sentrál Timor-Leste (BCTL-sigla portugés), sei halo estudu no análize kle’an kona-ba vantajen no dezvantajen utilizasaun moeda dolar ka uza osan rasik ka uza moeda rasik,” aprezenta primeiru-ministru.

Jornalista: Rafy Belo | Editór: Manuel Pinto

Imajen: Primeiru Ministru aprezenta programa governu iha parlamentu nasionál.