quarta-feira, 25 de julho de 2018

Situasaun Polítika Afeta ba Orsamentu, AIFAESA Foku Inspesaun Iha Dili

PARTILHAR

DILI, (TAOLI) - Diretór Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Gabriel da Costa, hatete AIFAESA daudaun ne’e halo inspesaun foku liu ba Autoridade Munisipál Dili tanba haree ba situasaun polítika ne’ebé iha afeta ba orsamentu atu halo atividade iha munisípiu seluk.

“Iha duodésimu ami só hetan de’it dólar 500 kada fulan liuliu ba AIFAESA, ida ne’e difikulta tebes, maibé kuandu iha munisípiu ruma mak halo keixa automátikamente ami buka dalan seluk atubele to’o iha ne’ebá hodi haree”, Gabriel afirma iha Matadouru, ohin.

Tanba ne’e foin daudaun AIFAESA halo inspesaun iha Manatutu, Baukau no Lautein no iha ne’ebé hetan infrasaun husi loja balun ne’ebé kontinua fa’an sasán liu prazu no prosesu submete ona ba parte jurídiku.

“Liuliu iha Manatutu komete infrasaun iha loja tolu ka haat, Baukau mós hanesan no Lautein mós, ne’ebé ami kontinua prosesa tanba agora AIFAESA haree kualkér atividade loja ka kioske sira ne’ebé komete infrasaun liuliu munisípiu sira até ohin loron prontu mai selu multa. Agora iha Baukau ema fa’an produtu liu prazu redús ona tanba sira mós atensaun liu ba serbisu AIFAESA tanba uluk husi Baukau mak komete infrasaun barak, maibé agora sira hatene ona selu multa ne’ebé prevene produtu ne’ebé hola liu prazu sira so’e ba lixu”.

AIFAESA nota katak iha produtu ne’ebé liu prazu akontese iha munisípiu tanba operadór ekonómiku sira bainhira sosa sasán la tau atensaun ba data prazu nian no haruka de’it sira-nia motorista mak hola nune’e sosa foin to’o de’it fulan rua ka tolu expire ona tanba ne’e AIFAESA husu ba operadór ekonómiku sira liuliu iha munisípiu atu hola produtu iha distribuidór atu fa’an tenke mai diretamente iha armazein atu indetifika produtu rasik.

“Ami bá iha ne’ebá sira dehan ladireta tun mai iha Dili, sira fó fiar de’it ba sira-nia motorista atu mai hola produtu sira ne’e tanba akontese ona, ami bá foti sira-nia produtu no sira dehan ami foin hola semana kotuk nusa buat ne’e liu prazu no sira hatete katak lahatene tanba produtu balun ne’ebé sira hola iha distribuidór sira balun oferese de’it tanba besik fulan rua, tolu atu hotu ona”.

Ho ida ne’e tenke haree didi’ak data prazu ne’e tanba dalaruma ema fa’an baratu sira hola, maibé lahatene fulan oin atu mate no bainhira AIFAEESA tun no hetan konserteza sira hetan multa.

Jornalista: Maria Auxiliadora | Editór: Manuel Pinto

Imajen: Departamentu Operasaun halo Inspesaun ba Hotel no Apartamentu, estabelesimentu hamutuk ualu. | Iha Aifaesa, Facebook
PARTILHAR

Author: verified_user

Publicação luso-timorense sem fins lucrativos

0 comentários: