Ameasa Prizaun ba Familia Gastão no Martinho Gusmão

DILI: Ministériu Públiku liu husi ninia alegasaun final husu tribunal aplika pena prizaun ba arguidu sira ne’ebé envolve iha kazu krime pekulatu, falsifikasaun dokumentus, administrasaun de noza, no abuzu poder.

Arguidu hirak ne’ebé envolve ba kazu ne’e mak eis Ministru Obras Públika, Transporte no Komunikasaun Gastão Sousa ho nia oan na’in rua, Jordão Francisco de Sousa no Ferlio Afonso de Sousa, eis Komisariu Komisaun Nasionál Eleisaun (amu) Martinho Gusmão, no eis Xefe Gabinete MOPTK Diogo da Costa.

Iha ninia alegasaun final, Ministériu Públiku (MP) husu ba tribunál atu aplika pena prizaun tinan tolu (3) suspende ba tinan 2 fulan 6 ba eis ministru Gastão Sousa.

Ba arguidu (amu) Martinho MP husu aplika pena prizaun tinan ida suspende ba tinan ida fulan neen (6). Arguidu Jordão no Frelio ho pena prizaun tinan rua suspde ba tinan rua fulan 6. Enkuantu ba arguidu Diogo aplika pena prizaun kompleta tinan ida, no ba falsifikasaun dokumentus ho pena konkreta tinan tolu prizaun supende ba tinan rua fulan neen.

Tuir MP, faktus ne’eb’e imputa ba arguidu Gastão provadu tanba iha tinan 2013 ADB oferese karreta ualu (8) no osan millaun $45 hodi aloka ba konstrusaun estrada husi Tibar to’o fronteira.

ADB oferese karreta atu halo monitorizasaun ba kontrusaun Estrada, maibé realidade arguidu Gastão apropriadu nia aan hodi fó karreta rua ba nia oan na’in rua atu utiliza tuir sira-nia hakarak.

Ba orsamentu, arguidu Gastão utiliza hodi halo manutensaun ba karreta ne’ebé (Amu) Martinho uza ba atividade ne’ebé sees husi servisu estadu nian (monitorizasaun estrada Tibar to’o Fronteira).

Ba arguidu Diogo ne’ebé iha altura ne’ebá nu’udar Xefe Gabinete hodi asina termu entrega karreta no osan, MP dehan, hatene klaru tebes katak karreta ne’e presiza rejistu sai propritariu estadu nian, maibé arguidu la halo ida ne’e.

Alende ne’e, arguidu mós hatene katak tuir loloos karreta refere labele entrega ba (Amu) Martinho tanba la’os atu ba halo atividade estadu.

“Mesmu nia (Diogo) hatene prosesu sira ne’e maibé nia halo nafatin,” deklara MP.

MP deklara tan, arguidu Diogo utiliza nia karreta privadu maibé ense mina ho bilete mina ADB nian dala 16.

Ba Gastão nia oan-mane na’in rua, Jordão ho Ferlio, MP dehan, hetan autorizasaun husi Gastão ne’ebé iha altura ne’ebá nu’udar ministru hodi privatiza karreta rua no uza hale’u sidade laran. Arguidu sira mós uza bilete mina husi ADB ba ense mina maske sira la hala’o atividade estadu nian.

Ba (Amu) Martinho, MP dehan, maske arguidu ne’e hatene katak kada tinan governu liu husi gabinete sosiedade sivil aloka orsamentu ba Dioseze sira maibé tenke liu husi pedidu formal ka proposta. Maibé iha altura ne’ebá arguidu ho verbalmente husu karreta ba Xanana Gusmão ne’ebé iha altura ne’ebá kaer pasta primeiru ministru.

Entretantu, defeza husi arguidu Gastão Sousa husu ba tribunal atu absolve nia kliente tanba nia konsidera iha intervensaun politika barak iha prosesu ba kazu ne’e.

Defeza husi arguidu Jordao ho Ferlio, inklui arguidu Martinho no Diogo husu ba tribunál absolve nia kliente tanba konsidera la komete krime ne’ebé imputa ba sira.

Hafoin rona deklarasaun hirak ne’e, tribunal adia julgamentu ba 17 Setembru 2018 tuku 14.00 hodi rona desizaun final.

Martinha Gusmão | Independente