DILI, (TATOLI) – Xefe Estadu
Maior FALINTIL-Forsa Defeza Timor-Leste (F-FDTL), Majór Jenerál Lere Anan
Timur, husu ba kandidatu membru Governu ne’ebé seidauk toma pose atu ajuda
lider nasionál sira rezolve impase polítika iha rai laran.
“Ha’u husu ba membru Governu
na’in sia atu toma konsiénsia katak labele hein de’it lider sira maka atu
rezolve impase polítika ida ne’e, maibé ita mós tenke ajuda sira (Lú Olo, Taur
no Xanana) para solusiona”, Lere ba jornalista sira iha Palásiu Prezidente Nicolau
Lobato, Bairru Pité, kuarta ne’e, hafoin soru-mutu ho Xefe Estadu, Francisco
Guterres Lú Olo, bainhira ko’alia kona-ba situasaun seguransa no polítika rai
laran.
Toka asuntu ne’e nia otimista
kandidatu membru Governu hanesan timoroan sei tulun lider istóriku sira buka
solusaun ba problema rai laran.
Iha biban ne’e, eis Komandante
Gerileiru mós la satisfas ho atetudi timoroan balun ne’ebé estraga imajen lider
nasionál sira hanesan Xanana, Lú Olo no Taur iha rede sosiál.
“Ha’u la toman ema sira ne’ebé halo
karikatura hodi estraga imajen lider nasionál sira. Kuandu ha’u toman duni,
ha’u sei toma pozisaun ba hahalok ida ne’e. Sala ka loos depois maka ha’u
justifika iha loron ikus”, akresenta.
Nia hateten timoroan balun ne’ebé
prátika hahalok ida ne’e presiza iha edukasaun uitoan no presiza respeitu malu.
“Sala ita tau ketak, maibé ita
labele nega ema nia sofrementu, ema nia partisipasaun, ema nia kapasidade hodi
komanda funu ida ne’e, nune’e ohin loron ita ukun án”, reafirma.
Jornalista: Xisto Freitas | Editora:
Rita Almeida
Imajen: Majór Jenerál Lere Anan Timur
Sem comentários:
Enviar um comentário