segunda-feira, 30 de julho de 2018

Ministra australianu iha Timor hafoin akordu kona-ba reseita ba petróleu ho gás

PARTILHAR

Ministra Negósiu Estranjeiru Austrália nian vizita, iha loron-segunda ne'e, Timor-Leste hodi hadi'a relasaun bilateral sira, hafoin konflitu ida entre nasaun rua kona-ba reseita sira hosi gás no petróleu no ne'ebé inklui mós alegasaun sira espionajen nian. 

"Asinatura hosi ami nia tratadu istóriku ba fronteira tasi nian loke ona kapítulu foun ida iha relasaun sira entre Austrália ho Timor-Leste", hatete hosi Julie Bishop ba kanal televizaun Australian Broadcasting Corporation (ABC).

Bishop, ne'ebé iha daudaun Díli hodi hasoru malu ho líder sira ne'ebé maka foin eleitu, hanesan primeira-ministra australiana dahuluk ne'ebé maka vizita Timor-Leste iha tinan lima ikus ne'e.

Austrália ho Timor-Leste asina ona, foin lalais ne'e, akordu ida hodi fahe reseita sira hosi petróleu ho gás hosi Tasi Timor.

Timor-Leste halo ona protestu ba validade hosi akordu ida hodi fahe reseita sira ne'ebé maka asina iha tinan 2006, hodi hatete katak Austrália halo ona eskuta sira iha gabinete governamental sira iha tinan 2004 hodi hetan vantajen ida ne'ebé la justu iha negosiasaun sira.

"Hanesan kestaun ida ho tensaun beibeik, hanesan ona preokupasaun ida ba ami iha ami nia relasionamentu ho Timor-Leste no ha'u senti satisfeitu tanba ami konsege ona kompromete ho prosesu ida ne'ebé hamosu rezultadu justu no ekilibradu ida", nune'e "agora ami bele kontinua apoia Timor-Leste hodi hala'o nia potensial ekonómiku", hatutan hosi ministra ba ABC.

Iha tinan 2017, Timor-Leste hasai ona kesar ne'ebé maka aprezenta hasoru Austrália iha tribunal importante liu hosi ONU, ne'ebé hatete hanesan asaun boa vontade ida antes akordu foun ne'ebé maka estabelese katak parte boot hosi rendimentu Tasi Timor nian pertense ba Díli.

Austrália konfirma ona iha fulan-Juñu katak akuza ona eis-espiaun australianu ida ho nia advogadu tanba halo konspirasaun tanba fó sai informasaun sekreta sira kona-ba alegasaun hosi espionajen nian.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: