quarta-feira, 1 de agosto de 2018

Karreta Prado iha Hela Prosesu Laran

PARTILHAR

DILI: Parlamentu Nasionál esforsu aan hodi rezolve problema karreta Prado, maibé to’o bainhira mak atu solusiona ne’e seidauk serteza tanba sei kontinua iha prosesu laran.

Prezidente PN, Arão Noe de Jesus hatete, Parlamentu Nasionál konsentra ba iha programa governu, agora ne’e konsentra hikas ba iha Orsamentu Jeral Estadu (OJE).

“Ba problema karreta ne’e sei iha hela prosesu nia laran”, dehan nia, iha Uma Fukun PN, horisehik.

Governu fó ona envelope fiskál ho montante osan tokon $9.1, maibé PN sei la tau orsamentu ba akizisaun karreta foun ba deputadu sira atu uza ba servisu.

Antes ne’e, Vise-Presidente PN, Luis Roberto, husu ba eis-deputadu III lejizlatura ne’ebé durante ne’e seidauk hatama karreta Prado, tenke hakru'uk ba lei hodi entrega hikas sasán povu nian.

“Osan devolve hotu ona ba sira ida-idak nia konta bankária tanba saida mak sira seidauk bele entrega. Tuir loloos, ita hanesan sidadaun ita tenke hakru’uk ba lei ne’ebe mak ita rasik atuur ona”, dehan nia.

Nia hatutan, eis-deputadu III lejizlatura oras ne’e daudaun deve hela Estadu, tanba sira lori sasán povu nian la tuir ona dalan legál. Sira nia osan fó fila ona maibé karreta la hatama ne’e krime, tanba ne’e presiza rezolve kestaun ne’e.

Deputadu Joaquim dos Santos mós hateten, eis-deputadu sira lori karreta Prado ba monta ona xapa matríkula privadu no surat mós tau ona naran tanba ne’e sira iha baze legál.

Hataan ba kestaun ne’e, Luis Roberto hatete, kestaun karreta ne’ebé nia xapa matríkula sai ona privadu ne’e PN sei bele servisu hamutuk ho Diresaun Nasionál Transporte Terrestre (DNTT) atu bele haree.

Oras ne’e daudaun PN V lejizlatura mós hasoru hela problema kona bá transporte, deputadu eleitu sira atu hala’o nia servisu loro-loron mós sei hasoru hela difikuldade.

Tanba ne’e, ba deputadu III no IV lejizlatura sira tenke hatama hotu karreta ba PN atu bele halo jestaun hodi fahe ba kada bankada atu bele uza ba servisu.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: