Timor-Leste Hatudu Ezemplu Ba Mundu

DILI, (TATOLI) – Embaixadór Timor-Leste ba Austrália, Abel Guterres, hateten povu no polítiku sira hosi Austrália konsidera povu Timor hatudu ezemplu ba mundu, tanba moris iha dame nia laran.

“Enkuantu polítiku sira ladún hamriik hamutuk, maibé povu ne’e hatudu dalan kapa’as. Ida ne’e importante liu. Tanba ne’e maka ha’u nu’udar embaixadór sente orgullu reprezenta povu Timor iha Austrália. Se ita mantein ida ne’e, investór sira sei mai investe iha Timor,” Abel hato’o informasaun ne’e ba jornalista sira iha Palásiu Prezidente Nicolau, Bairru Pité, Dili, kuarta ne’e, hafoin briefing Prezidente-Repúblika, Francisco Guterres Lú Olo, kona-ba serbisu embaixada Timor-Leste nian iha Austrália.

Nia haktuir tan serbisu ne’ebé nia halo iha Austrália kona-ba dezenvolvimentu ekonómiku, tanba demokrasia bele la’o di’ak maibé kuandu ema hamlaha sei akontese problema.

Tuir Abel demokrasia ne’e atu metin liu tenke iha ekonomia ne’ebé di’ak para fó kbiit ka fó enerjia ba povu, entaun serbisu boot liu ne’ebé embaixada TL iha Austrália tenke halo maka oinsá setór privadu hosi Austrália no rai sira ne’ebé iha rejiaun atu mai halo investimentu iha Timor-Leste.

“Ida ne’e serbisu ida ne’ebé maka ami tenke halo iha Austrália, tanba ita nia relasaun ne’e agora di’ak nomós oinsá maka halo funan liu-tan amizade entre povu rai rua no oinsá maka investór setór privadu hosi Austrália bele mai investe iha Timor-Leste”, diplomata ne’e haklaken.

Nia afirma vizita Ministra Negósiu Estranjeiru no Kooperasaun Austrália, Julie Bishop, mai Timor-Leste iha loron hirak liu-ba ne’e susesu teb-tebes, katak, hahú pájina foun iha istória relasaun bilaterál.

Nia hein katak iha tinan hirak tuir mai bele fó rezultadu ne’ebé di’ak ba dezenvolvimentu ekonómiku Timor-Leste.

Jornalista: Xisto Freitas | Editora: Rita Almeida

Imajen: Embaixadór Timor-Leste ba Austrália, Abel Guterres