DILI: Situasaun polítika iha
Timor-Leste presiza solusiona lalais tanba fó efeitu negativu makaas ba
ekonomia povu Timor-Leste.
Kompañia barak komesa taka,
nune’e balun hamenus ona traballadór. Tanba ne’e, ema barak komesa ‘kesi kabun’
liuliu sira ne’ebé servisu hodi sustenta moris família nian.
Observadór Akadémika Universidade
da Paz (UNPAZ), Lucas da Costa hateten, lideransa sira tenke atu halo
komunikasaun di’ak hodi hakotu impase polítika atu labele kauza ba ekonomia rai
laran, tanba oras ne’e daudaun povu ki’ik ne’ebé buka moris iha dalan atu
sustenta vida família no oan sira ba eskola susar tebes.
“Krize mosu impaktu ba sosiedade.
Kuran ba buat hotu, iha han-hemu, hatais, osan atu selu ba eskola, tanba Krize
ekonomia rai laran ne’e mai husi krize polítika, ne’ebé mai husi impase
polítika”, dehan iha kampus UNPAZ, horisehik.
Presiza Prezidente Repúblika
komunika ho Primeiru Ministru, halo konsulta ho parlamentu hodi hakotu ho
impase ne’e.
Entertantu, Rede Defensor
Direitus Humanus (RDDU) kompostu husi sosiedade sivíl sira ne’ebé tau matan ba
asuntu direitu umanu husu ba lider polítiku sira hodi promove diálogu no
aprosima tribunál hodi hakotu impase polítika iha Timor.
Portavós RDDU, Inocêncio de Jesus
Xavier hateten, lideransa sira presiza promove komunikasaun polítika ne’ebé
intensivu hodi hasees diverjénsia polítika ódiu vingansa ne’ebé la util ba
povu, nune'e hakotu imediata impase polítika ne’ebé seidauk iha solusaun.
“Risku ne’e bele hamosu
instabilidade ekonomia sosiál, polítika no seguransa ne’ebé sai nu’udar direitu
integrál husi direitu umanu ne’ebé potensialmente bele afeta povu nia moris
bainhira laiha solusaun ba situasaun ne’e”, tenik nia.
Nia esplika, impase polítika ne’e
nu’udar kauza nasionál ne’ebé bele impede funsionamentu mákina estadu tomak, hodi
prejudika prosesu dezenvolvimentu nasionál no povu nia-ekonomia iha baze tanba
laiha orsamentu jerál nian ne’ebé sirkula.
Independente
Sem comentários:
Enviar um comentário