DILI, (TATOLI) – Xefe
Estadu, Francisco Guterres Lú-Olo deklara atu rezolve impasse
polítika, presiza lider sira tuur hamutuk.
“Ita kuandu tuur hamutuk hodi
ko’alia impasse ne’e, ita bele ultrapasa situasaun ne’e,” Prezidente Repúblika,
Lu-Olo afirma hafoin abertura ba konferénsia internasionál kona-ba asuntu tasi
nian iha Ministériu Finansa, Ohin.
“La iha ema ida mak hanoin atu kria
impasse polítika, maibé tenke fó hanoin hamutuk atu bele ultrapasa situasaun
polítika,” Xefe estadu fó hanoin tan relasiona ho deklarasaun Prezidente
Aliansa Mudansa ba Progresu (AMP), Xanana Gusmão kona-ba impasse polítika
hanesan lisaun atu aprende nian.
Maski nune’e tuir Xefe estadu
loron ruma impasse ne’e sei iha solusaun, tempu sei iha atu rezolve, tanba ne’e
mak labele dun fali ema ida mesak mak rezolve, maibé ita hotu tenke hamutuk
hodi hatán ba impase ne’ebé eziste iha Timor-Leste durante tinan ida ho balun.
“Ha’u nomea ona kandidatu membru
governu na’in tolu liuhosi dekretu prezidensiál no sei marka data ba tomada
posse. Hosi kandidatu membru governu na’in tolu ne’e mak Ministru Planeamentu
Investimentu Estratéjiku (MPIE), Samual Marçal, Ministru Petróleu no Mineral,
Alfredo Pires no Vise Ministru Agrikultura no Peska, Rogério Araujo Mendonça.” Lú
Olo esplika.
Entretantu, kandidatu membru
governu nain neen ne’ebé sei pendente, Xefe Estadu dehan hafoin fó posse ba
kandidatu na’in tolu mak foin haree fali sira seluk.
Jornalista : Zezito Silva | Editór
: Manuel Pinto
Imajen: Prezidente Repúblika,
Francisco Guterres Lú Olo. Foto António Goncalves
Sem comentários:
Enviar um comentário