quinta-feira, 16 de agosto de 2018

Lider Karismátiku Xanana Gusmão Husu Hadomi Pás


DILI, (TATOLI) - Lider Karismátiku, Kay Rala Xanana Gusmão, husu timoroan hotu atu hadomi pás hodi kontribui ba estabilidade iha prosesu harii nasaun no insiste fiar án nafatin no kalma.

“Husu ba hothotu hadomi pás, hahalok hothotu ne’ebé hasai ba maluk seluk iha komunidade nia laran. Harii pás, hodi ita bele dehan laiha difikuldade iha ita-nia vida ne’ebé ita labele hakat liu”, eis-lider rezisténsia, Kay Rala Xanana Gusmão, fó mensajen liuhusi jornalista sira iha iha Palásiu Governu, ohin.

Xanana Gusmão halo komparasaun katak nasaun barak iha mundu ne’ebé ukun án liu tinan 60 ka 70 nia situasaun dalaruma sei aat liu ita-nian.

“Mas la’ós tanba aat liu ne’e mak ita bele halo liu buat hothotu ne’ebé aat, kontribuisaun bo’ot husi sosiedade ho povu tomak liliu juventude maka garante pás, estabilidade nafatin. Pás nafatin hodi buat ne’e (situasaun polítika-red) ita ultrapasa”, Xanana fó hanoin.

Aprende Prosesu

Eis-lider rezisténsia mós hatete impase polítika ne’ebé oras ne’e dadaun Timor-Leste hasoru, nu’udar lisaun ba ema hotu, liliu joven sira atu aprende no komprende prosesu harii no konstrusaun Estadu.

“Ba joven sira, lalika ko’alia arbiru. Aprende!”, Kay Rala Xanana Gusmão husu ba foinsa’e, feto no mane timoroan sira tomak iha fatin hothotu.

Kestiona kona-ba oinsá ninia esperansa relasiona ho ne’ebé ohin loron hasoru, lider rezisténsia ne’e hatan lakonikamente: “Sempre!”.

Tanba ne’e nia hanoin hikas katak ema barak mate, se ho kilat musan no materiál barak, ema barak dadur, ema barak terus iha prosesu ba libertasaun nasionál ita sempre iha esperansa. “Buat ikus liu husi mate ne’e mak esperansa ne’e”, tenik Xanana hodi konklui.

Jornalista: Rafy Belo | Editora: Rita Almeida

Imajen: Kay Rala Xanana Gusmão bainhira halo entrevista ho jornalista sira iha edifísiu g7+, aredores Palásiu Governu, ohin. Foto António Goncalves

Sem comentários: