terça-feira, 14 de agosto de 2018

UDT kontinua konsolida-an “Fo apoia total ba VIII Govenu”


Tinan 10 ba kotuk, partidu historiku  União Democratico Timorense (UDT) ‘vakum’ iha palku politika nasional. Liu-liu, la iha nia reprezentante iha Parlamentu Nasional (PN) hodi sai matan, tilun no ibun ba UDETISTA sira. Maibe, ba periodu 2018-2023, UDT hetan fiar hikas hodi ninia reprezentante ba iha PN, ho nune’e, UDT kompromete sei sai duni reprezentativu ida ne’ebe luta ba povu nia moris diak.

Atu konkretiza mehi UDT nian, Sabadu (11/8/2018), UDT halo enkontru nivel estrutura ho fundador seluk hodi nomeia ninia membru konsultivu minisipiu 12, inklui Rejiaun Administrativu Especial Oecusse-Ambeno (RAEOA) atu bele konsolida an hametin liu tan estrutura iha bazew no hakbesik an nafatin ba povu iha baze.

“Biban ne’e UDT hakarak fo agradesementu ba UDETISTA tomak tanba fo apoia ba UDT nune’e UDT naran boot fila fali hafoin fakum iha tinan 10 nia laran,” alerta Prezidenti UDT, Gilman Exposto Santos, liu husi konferensia imprensa hafoin ekontru nivel estrutura iha Comite Central UDT, Palapaso, Dili.

Gilman Santos hato’o mos nia agradesementu wain ba bloku koligasaun Frenti Dezenvolvimentu Demokratiku (FDD) ne’ebe kompostu husi partidu hat, maske dadaun ne’e bloku la ejiste ona.

Gilman aprofunda katak, iha periodu ne’e UST deside fo apoiu ba VIII Governu nudar vatazen boot id aba UDT ho Frenti-Mudança iha futuru.

“Apoia ne’ebe UDT no Frenti-Mudança ba AMP hodi apoia Governu, hau espera katak sei iha vantagem ruma, tanba iha konsiderasaun boot husi AMP ba partidu rua ne’e, ne’ebe hau hakarak hateten katak UDT no Frenti-Mudança prontu atu servi nafatin povu TL tuir ami no partidu nia kbiit, ami prontu apoia Governu durante tinan lima, hau espera buat hotu lao diak no hakotu impasse politiku ne’ebe akontese,” hateten Gilman Santos.

Iha fatin hanesan, Fundador partidu UDT, Antonio Sousa Nascimento akresenta, nomeiasaun ba membru konsultivu munisipal ne’e possibilidade diak ida ba UDT hodi prepara diak liu tan estrutura UDT nian.

“Hau hanoin ho eleisaun ba membru Konsultivu municipal ne’e possibilidade diak ida, tanba UDT mos iha líder ne’ebe maka valor tebes ba nasaun hodi nune’e hatudu ba povu katak UDT la’os deit iha istoria, maibe ninia lideransa mos iha kapasidade,” hateten Antonio Nascimento.

Biban ne’e Sekretario Jeral Partidu UDT, Francisco X. D. Carlos hateten, UDT estabelese membru ho prinsipiu fiar an katak iha tinan lima mai UDT bele avansa liu tan ba oin.

“UDT ho prinsipiu fiar an katak iha Mundu laiha buat ida maka impossível, tanba bainhira ema seluk bele, ami fiar ami mos bele, ne’ebe iha tinan lima mai UDT sei sai boot liu tan,” afirma Francisco Carlos.

Momentu ne’e UDT mos komemora mos loron Movimentu Revolusionario Anti Komunista ne’ebe monu iha loron 11 Agostu. Iha komemorasaun ne’e partisipa husi estrutura no fundador partidu UDT. mia

GMN TV | Grupo Média Nacional

Sem comentários: