DILI, (TATOLI) – Kordenadór
Interinu Rezidente Organizasaun Nasaun Unida (ONU) iha Timor-Leste, Dageng Liu,
hatete iha Timor-Leste maski iha progresu di’ak ne’ebé hala’o ona depois
independénsia, maibé sei iha preokupasaun tanba iha ema barak maka seidauk bele
hetan ai-han adekuadu, má mutrisaun no hamlaha kontinua sai kestaun.
“Global Hunger Index 2017 hatudu
katak númeru hamlaha iha Timor-Leste nu’udar sériu. Númeru má nutrisaun
kontinua aas, labarik 1 husi na’in-2 ho tinan lima mai karik sofre raes badak
ka badak liu ba sira-nia idade tanba sira la asesu ba ai-han adekuadu no dalaruma
ai-han ne’ebé sira konsome ladún nutritivu hodi fó kreximentu no
dezenvolvimentu ba sira-nia kakutak no isin”, Dageng afirma ida ne’e iha loron
mundiál alimentár 2018 nian ohin, liuhusi komunikadu ne’ebé dirije ba Tatoli.
Nia dehan iha estimasaun katak
kustu deznutrisaun ba pezu ekonomia Timór hamutuk milliaun $41 iha kada tinan
tanba lakon produtividade, dezempeñu serbisu ne’ebé ladún di’ak nomós aumenta
kustu ba saúde hodi reprezenta porsentu 1-2 husi GDP (Gross Domestic
Product).
Liu tinan sanulu ona Governu
Timor-Leste prioritiza hodi garante seguransa ai-han no kombate má nutrisaun,
nune’e iha buat balun susesu liuhusi polítika no estrutura estratéjika ne’ebé
forsa no mekanizmu hanesan multisetorál hanesan Planu Asaun Zero Hamlaha hodi
eradika hamlaha no subnutrisaun iha país ne’e nomós Konsellu Nasionál Seguransa
no Soberania Alimentár no Nutrisaun Timor-Leste (KONSSANTIL).
Hatutan atu atinje laiha hamlaha
no má nutrisaun iha 2030, tenke aselera no aumenta asaun hodi haforsa
reziliénsia no adapta kapasidade sistema ai-han no moris ema nian hodi responde
ba mudansa klimátika oioin, hanesan Timor-Leste hasoru ona mak El Niño (bailoro
naruk) no La-Nina ka udan lapara.
Nasaun Unida prontu hodi suporta
Governu Timor-Leste hodi promove mudansa hahalok pozitivu iha komunidade no
asisténsia ne’ebé di’ak liu hodi kria ambiente ida ne’ebé fó fatin ba
ezisténsia sistema no organizasaun sira hodi hadi’a seguransa ai-han no
nutrisaun nomós suporta koordenasaun no polítika diálogu hodi hetan rezultadu
nutrisaun ida ne’ebé di’ak liu.
Jornalista: Maria Auxiliadora | Editora:
Rita Almeida
Imajen: Labarik nain tolu halimar
hela iha bero Leten iha Tasi ibun Bidau Santana, Dili 29 Marsu 2017. Labarik
sira halimar hodi hein sira nia aman sira neebe ba buka ikan iha Tasi
laran.Foto TATOLI
Sem comentários:
Enviar um comentário