Ministru Negosiu Estranjeiru
japonéz afirma iha loron-sesta ne'e, iha Dili, katak Tokio hakarak revitaliza
relasionamentu ho Timor-leste, liu hosi fortalesimentu rekursu umanu, ekonomia,
setor marítimu no kooperasaun rejional.
"Japaun no Timor-Leste
hanesan parseiru importante ne'ebé maka fahe valores baziku sira. Ami hakarak
revitaliza ami nian relasionamentu ba faze foun ida", hatete Taro Kono ba
jornalista sira, iha deklarasaun ida, iha omologu timoroan nian sorin, ministru
interinu Negosiu Estranjeiru, Agio Pereira.
Kono destaka katak objetivu maka
avansa iha "kooperasaun iha kampu maritimu, liu hosi konsulta trilateral
ida entre Japaun, Timor-Leste no Indonezia", no kontinua kontribui ba
dezenvolvimentu infraestrutura iha Timor-Leste.
"Konabá kooperasaun
rejional, ami hanesan nasaun maritimu rua iha Indo-Pasifiku no ami konkorda
hodi serbisu hamutuk hodi konsegue Indo-Pasifiku ida ne'ebé livre no nakloke,
tuir direitu internasional no iha liberdade ba navegasaun, rejeita tentativa
sira unilateral sira hodi muda 'status quo'", subliña.
Kono hatete katak prósima
reuniaun sir iha Dili pretende kontinua diskuti tema rejional sira, inklui mós
Koreia Norte.
Agio Pereira mós destaka apoiu
ne'ebé maka Japaun fó ba dezenvolvimentu Timor-leste nian, iha área sira
hanesan fortalesimentu infraestrutura nian no formasaun ba kuadru sira, no
konsidera katak vizita ne'e kontribui hodi "haforsa relasaun bilateral
sira".
Ezemplu ida ba apoiu ne'e maka
konstrusaun ponte foun mota Comoro nian, iha parte osidental Dili nian, ne'ebé
oferese hosi Governu japonéz no konstitui "testemuñu interese Japaun nian
iha dezenvolvimentu infraestrutura Timor-Leste nian", hatete.
Iha ajenda bilateral, iha mós
tema sira hanesan kooperasaun iha área defeza nian no edukasaun nian, no mós
programa bolsa ne'ebé maka sei ajuda funsionariu publiku timoroan sira, refere
mós.
"Programa ida ne'ebé maka
ami konsidera importante tebes laos de'it ba prespetiva akadémika, maibé hosi
mós dezenvolvimentu karáter disiplina funsionariu sira nian ne'ebé maka atu ba
estuda iha Japaun", hatete.
Importante mós apoiu japonéz nian
iha área sira ahnesan alterasaun klimatika no preparasaun ba dezastre natural
sira, akresenta tan responsavel timoroan ne'e.
Lider na'in rua ne'e asina akordu
ba programa ida fortalesimentu rekursu umanu timoroan sira nian liu hosi bolsa
de estudu iha universidade japonezes.
Aleinde troka nota sira iha nivel
ministerial asina mós akordu ida konabá programa ne'ebá, hosi reprezentante
ajénsia kooperasaun japoneza (JICA) iha Timor-Leste, Nagaishi Masafumi, no ho
diretor jeral Institutu Nasional Administrasaun Públika (INAP) timoroan nian,
Agostinho de Deus.
Akordu ne'e maka apoiu ba
formasaun no kapasitasaun rekursu umanu timoroan sira nian, elementu sentral
ida kooperasaun japoneza nian ho Timor-Leste, liu hosi projetu Bolsa
Dezenvolvimentu Rekursu Umanu nian (JDS, sigla ho inglés).
Tuir kooperasaun japoneza,
objetivu projetu JDS nian, ne'ebé maka agora ne'e implementa hela iha nasaun
15, hodi "apoia dezenvolvimentu rekursu umanu iha nasaun sira ne'ebé maka
simu ajuda japonés, liu hosi funsionariu governamental sira no sira seluk".
Objetivu maka fó bolsa ba
formandus timoroan sira hodi ba estuda iha universidade japoneza sira hodi
hetan "koñesimentu ne'ebé espesializadu, halo peskiza sira no halo rede
sira" kontaktu nian.
Primeiru xefe diplomasia nipónika
ne'ebé ba Timor-Leste, Taro Kono vizita nasaun ne iha tinan 2001, antes
restaurasaun independensia, hanesan observador eleisaun ba Asembleia
Konstituinte.
Taro Kono konsidera katak notavel
tebes dezenvolvimentu alkansadu iha kapital timoroan nian ne'e, rezultadu hosi
"esforsu boot" populasaun nian.
SAPO TL ho Lusa
Sem comentários:
Enviar um comentário