Governu timoroan rezolve problema sira ne'ebé maka kondisiona pagamentu ezekutivu nian

Governu timoroan konsegue rezolve iha loron-segunda ne'e problema final sira ne'ebé hetan iha introdusaun dadus Orsamentu Jeral Estadu nian ba tinan 2018 ne'ebé maka iha fulan ne'e kondisiona pagamentu sira balun, hatete ba Lusa hosi fonte ezekutivu.

"Sistema sira totalmente funsiona fali ona ho Orsamentu Jeral Estadu nian ba tinan 2018. Liña ministerial sira hotu bele komesa prosesa pagamentu sira hahú loron-segunda ne'e", hatete xefe Unidade Sistema Integradu Informasaun no Jestaun Finanseira (USIIGF) nian, Joanico Pinto iha deklarasaun ba Lusa.

Durante semana hira ikus ne'e divizaun oioin hosi ministeriu sira no instituisaun balun sistema publiku timoroan nian iha difikuldade hodi prosesa pagamentu sira, ne'ebé maka kondisiona asaun estadu nian.

Joanico Pinto esplika problema ne'e katak iha relasaun ho rekonsiliasaun ne'ebé maka presiza aplika entre dadu sira referente ho Orsamentu Jeral Estadu nian ba tinan 2018, ne'ebé maka so vigora hahú hosi fulan ne'e no dadu sora reseita no despeza sira ne'ebé aplika ho rejime duodesimal, dezde fulan 01 Janeiru too fulan 30 Setembru.

Prosesu ida ne'ebé difisil tanba obriga ajusta kategoria orsamental sira tuir lei VIII Governu Konstitusional nian - ne'ebé iha funsaun fulan hat ona.

"Iha Ministeriu ne'ebé maka hamutuk no agora fahe tiha, no seluk ne'e maka hamutuk no mós seluk ne'ebé maka lakon tiha no buat sira ne'e hotu tenki ajusta iha sistema", esplika.

Joanico Pinto ida ne'e maka hanesan problema ida ne'ebé maka suspende funsionamentu Portal Transparénsia nian, ne'ebé maka jere hosi Ministériu Finansas, ne'ebé fó detalla besik iha 'real time' reseita no gastus publiku sira.

"Problema ne'e laos ho sistema, maibé ho rekonsiliasaun dadus sira nian. Sistema ne'e loke hela dezde loron 08 Outubru no instituisaun sira ne'ebé maka la iha problema bele halo hela pagamentu sira", hatete.

Husu konabá persentajén ne'ebé maka Estadu ne'e afeta, Pinto hatete katak difisil hodi kuantifika tanba iha ona divizaun balun ne'ebé maka funsiona no seluk ne'ebé maka seidauk, iha kada Ministériu nian laran.

"Ami hasoru kazu ida por ida. Ho enerjia, tempu no foku, ami rezolve situasaun ne'e", esplika.

Portal Transparénsia sei kontinua indisponivel too meiu-dia loron segunda ne'e.

Iha pratika ne'e koalia konabá valor sira ne'ebé gasta ba Dotasaun Orsamental Temporariu (DOT) rejime duodesimal nian ho gastu sira ne'ebé maka Ministeriu ida-idak iha tuir Orsamentu Jeral Estadu nian ba tinan 2018.

Situasaun politika iha Timor-Leste, ne'ebé maka disolve tiha Parlamentu no eleisaun antesipada, kondisiona tiha finansas publika - no iha konsekuénsia ba ekonomia nasaun nian.

Timor-Leste iha rejime duodesimal dezde fulan Janeiru no Orsamentu Jeral Estadu nian ba tinan 2018 so aprova hosi Governu no parlamentu iha fulan Setembru no promulga iha final fulan Setembru nian hosi Prezidente Republika.

Orsamentu ho valor dolares millaun 1.279,6 ne'ebé maka engloba reseita no despeza sira Estadu nian no Seguransa Sosial Timor-Leste nian entre loron 01 Jeneiru no 31 Dezembru 2018.

Espektativa Governu nian maka bele ezekuta dolares millaun 700 resin iha trimestre ikus tinan ne'e nian.

Dotasaun orsamental nia ba tinan ne'e inklui dolares millaun 200,25 ba salriu no vensimentu sira, millaun 354 ba bens no serbisu, millaun 324,2 ba transferénsia publika sira, millaun 5,11 ba kapital menor no millaun 393,75 ba kapital dezenvolvimentu.

Total despeza sira serbisu nian ne'ebé la iha autonomia administrativa no finaseira no órgaun autonomus sira ne'ebé la iha reseita rasik hamutuk dolares millaun 830,54.

Iha kofre sira Estadu nian tenki tama fali dolares millaun 188,8 hosi resita sira laos petroliferas.

Diferensa, dolares millaun 982,5, koresponde ba levantamentu ne'ebé maka tenki halo hosi Fundu Petroliferu, ne'ené maka millaun 550,4 hosi Rendimentu Sustentável Estimadu no sira seluk levantamentu adisional.

SAPO TL ho Lusa