Rekrutamentu Ba Kandidatu PNTL Seidauk Bele Halo

DILI, (TATOLI) - Komisáriu Polísia Nasionál Timor-Leste (PNTL), Júlio da Costa Hornay, hatete rekrutamentu ba kandidatu PNTL iha 2019 seidauk bele halo.

“Primeiru-Ministru hatete katak rekrutamentu ba tinan 2019 seidauk bele halo. Ami seidauk iha desizaun finál, maibé ohin Primeiru-Ministru fó ona warning katak tantu PNTL ho FDTL iha 2019 laiha rekrutamentu mas orsida ita diskute ho tékniku sira maka foin haree”, Júlio informa ida ne’e hafoin defeza orsamentu PNTL nian iha Komité Revizaun Polítika Orsamentu Jerál Estadu 2019 iha Aitarak-Laran, ohin.

Komandante Jerál PNTL ne’e dehan razaun lahalo rekrutamentu tanba orsamentu maka ultrapasa tiha plataforma, maibé tuir instituisaun nia hanoin ida ne’e importante tanba atu reforsa efetivu sira iha terrenu.

“Efetivu sira iha terrenu to’o agora ita bele dehan mínimu tebes liuliu ba eskuadra sira ba OPS. Ita haree OPS sira loloos ne’e sira-nia misaun ne’e permanente iha suku, maibé tanba efetivu eskuadra lapermite, uitoan, entaun só bá vizita depois filafali mai reforsa eskuadra tanba sira hola parte iha membru eskuadra nia. Bazea ba ida ne’e maka PNTL nesesita atu halo rekrutamentu hodi reforsa servisu operasionál iha terrenu liuliu iha área tránzitu nomós polisiamentu komunitária mas Primeiru-Ministru haree ba orsamentu hanesan nee, depois orsida tékniku orsamentu sei haree filafali”.

Hatutan hafoin diskusaun iha KROP tékniku husi PNTL sei hasoru malu fali ho finansas nian atubele ko’alia sobre asuntu ne’e.

Iha orsamentu PNTL ba 2019 propoen millaun $39 resin liuliu ba atividade operasionál sira hanesan kombustivel, alimentasaun, kompra viatura hodi suporta operasionál iha terrenu hanesan patrullamentu, tránzitu no unidade espesiál sira-nia serbisu.

“Ne’e importantísimu tanba envelope fiskál millaun $26 resin ne’e ita koloka ba buat haat, saláriu no vensimentu, ba bens ne’e ita koloka ba alimentasaun, mina, manutesaun nomós saláriu ba tékniku sira de’it, entaun osan uitoan de’it. Tanba ne’e maka parte importante sira ne’e orsamentu lakobre tanba ne’e maka ita tau iha adisionál hodi husu Primeiru-Ministru nia ekipa ne’ebé tama iha Komité Revizaun Orsamentu atubele konsidera ida ne’e, nune’e bele suporta servisu Polísia Nasionál Timor-Leste iha área seguransa nian”.

Jornalista: Maria Auxiliadora | Editór: Manuel Pinto

Imajen: Komandante Jerál Polísia Nasionál Timor-Leste (PNTL), Júlio da Costa Hornay. Foto Tatoli/Antonio Goncalves