Timor-Leste presiza estudu
jeolójiku ne'ebé "rigorozu no fiavel", hodi defini politika ne'ebé
informada liu no garante uzu sutentavel ba rekursu natural sira, no ajuda mós
dezenvolve kapasidade teknika nasional, hatete Prezidente timoroan iha loron-tersa
ne'e.
"Estudu jeolójiku
sira-ne’ebé rigorozu no fiavel importante tebetebes hodi hasa’e ema nia
koñesimentu kona-ba rekursus naturais ne'ebé mak Timor-Leste iha hodi
dezenvolve-an", hatete Francisco Guterres Lu-Olo, iha konferénsia ida iha
Dili.
"Ordenamentu territóriu
nasionál signifika uza informasaun hirak-ne'e hodi halo planifikasaun no
jestaun rekursus ba dezenvolvimentu sustentável, la’ós de’it iha nível rejionál
maibé mós iha nasionál", hatete.
Lu-Olo hatete iha Centro de
Convenções de Díli, ne'ebé maka iha loron-tersa ne'e hahú Konferénsia
Internasional Jeosiénsoa nian ba dala 4, ne'ebé organiza hosi Institutu
Petroleo no Jeolojia (IPJ), ne'ebé maka reuné espesialista nasional no
internasional sira iha semana ne'e no ne'ebé maka sei analiza tematika oioin.
"Dadus no Informasaun
Jeolójika Timor-leste nian ba Diversifikasaun Ekonomika no
dezenvolvimentu" maka sai tema sentral iha enkontru ne'ebé maka sei
analiza aspetu sira oioin hanesan rekursu ídrikus no petroliferus on shore,
impaktu ba alterasaun klimatika no estudu sira konabá risku rai-nakdoko nian no
tsunami.
Iha Lu-Olo nian intervensaun, nia
rekomenda katak estudu sira ne'ebé iha baze hosi rekursu nasaun nian serve
"laos de'it atu halo projetu, maibé mós atu propoin no harii polítika, lei
no regulamentu sira. Rezultadu estudu sira-nian tenke fó sai ba sidadaun sira,
ba komunidade sira no mós ba kompañia públiku no privadu sira".
"Tuir ha’u-nia hanoin,
sira-ne’ebé kaer pozisaun lideransa polítika iha jerál, no iha Estadu laran,
tenke koñese didi’ak ita-nia habitat rasik no oinsá mak ita bele hadi’ak liután
habitat ne’e atu lori moris-di’ak ba ita-nia Povu", defende.
Serbisu iha kampu ne'e tenki
aproveita hodi haforsa "kualidade koñesimentu tekniku no sientifiku"
timoroan sira nian, no mós atu hametin "espasu koñesimentu no informasaun
sira-ne’e hodi promove mekanizmu no métodu hirak ne'ebé transparente liután
kona-ba atividade no informasaun iha área jeolójika mineira".
Xefe Estadu rekorda katak
investigasaun ne'ebé halao ona durante dekada sira ne'e, ba potensial rekursu
natural sira Timor-Leste nian, importante tebes kontinua nafatin estudu sira
ne.
"Lisensiamentu ba
esplorasaun mineira la’ós metáliku, hanesan rai-henek no fatuk, ne'e de'it la
to'o. Ita presiza mós asegura peskiza jeolójika ba beibeik, habelar informasaun
importante hirak ne'ebé rezulta hosi peskiza ne’e no define no ezekuta polítika
públika sira tuir informasaun ne'ebé mak hetan. Programa Governu ne'ebé de’it
tenke haree ba kestaun sira-ne'e", defende.
Tuir Lu-olo projetu sira hanesan
Tasi Mane - dezenvolvimentu kosta súl iha ámbitu esplorasaun ba posu sira
Greater Sunrise, iha Tasi Timor -, ita presiza haree projetu ne’e no projetu
seluseluk hosi perspetiva ida ne’ebé luan no globál liután, perspetiva
hirak-ne'e fó dalan ba "integrasaun no esplorasaun rekursu naturál
sira-nian, inklui ninia uzu no jestaun, tuir opsaun no alternativa hirak ne'ebé
lori benefísiu ba tempu natoon no naruk".
Hatete katak Timor-Leste tenki
hare ba esperiénsia sira iha rai-liur hodi aprende, hanesan oinsá uza enerjia
jeotermal ka rekursu natural sira, no hodi hamenus risku sira.
"Falta koñesimentu kona-ba
jeolojia bele fó prejuízu ekonómiku, sosiál no ambientál ne'ebé boot. Okupasaun
ba área risku hosi komunidade sira-ne'ebé ladún informadu bele haboot risku
ne’ebé fó ameasa ba sustentasaun hosi ema nia vida, la’ós de’it ohin loron
maibé mós aban-bainrua, no bele hatún pozisaun Estadu nian hodi transforma
rekursu minerál sira ba ema barak nia di’ak", hatete.
"Falta koñesimentu kona-ba
jeolojia bele mós kontribui hodi hametin ba nafatin vizaun ida ne’ebé
imediatista no utilitarista kona-ba natureza, hodi ignora impaktu hirak ne’ebé
hahalok ema nian bele fó ba natureza", subliña mós.
Hanesan ezemplu Lu-Olo refere
erozaun ka rai-halai sai ona problema ida iha Timor-Leste no sei hein
"intervensaun ida ne'ebé luan hosi Estadu, inklui mós halo sosializasaun
ba sidadaun sira iha territóriu laran tomak, iha sentru urbanu no mós iha fatin
izoladu".
"Koñesimentu no lala’ok
protesaun no dezenvolvimentu ba rekursu jeolójiku no naturál sira sai hanesan
komponente ida hosi ezersísiu sidadania no soberania timoroan, no hametin sentidu
katak rekursus sira-ne'e públiku, pertense ba ita hotu-hotu no sai nu’udar
elementu hosi prosesu identifikasaun ho buat hirak ne'ebé hale’u ita",
hatete.
Nia mós hatete tan katak, estudus
barak liutan bele ajuda rezolve problema sira hanesan rai-halai ka rai-monu
ne'ebé maka estraga estrada sira ne'ebé foin halo no infraestrutura nasional
sira.
SAPO TL ho Lusa
Sem comentários:
Enviar um comentário