Portugal no Cabo-Verde Sei Ajuda TL iha Área Tolu

DILI, 08 maiu 2019 (TATOLI) - Governu Portugal no Cabo-Verde sei ajuda Governu Timor-Leste (TL) iha área importante tolu  hodi hametin liu-tan kooperasaun nu’udar nasaun Membru Komunidade Ko’alia Lian Portugés (CPLP-sigla portugés).

Kooperasaun tolu ne’e, nasaun rua deklara fó ajuda ba Timor-Leste hosi reuniaun altu nível entre Ministru Administrasaun Interna, Ministru Interiór CPLP ho nasaun membru sira iha Portugal no Cabo-Verde.

Área tolu ne’ebé Portugal no Cabo-Verde sei fó apoiu maka, 1) protesaun sivíl no bombeiru, 2) kooperasaun iha área serbisu polísia nian, no 3) kooperasaun kona-ba serbisu migrasaun nian.

Sekretáriu Estadu Protesaun Sivíl (SEPS), Alexandrinho Xavier Araújo  dehan, Timor-Leste agradese ba inisiativa atu apoiu Timor-Leste.

“Ha’u reprezenta Ministru Interiór hodi partisipa iha enkontru altu nível Ministru Administrasaun Interna, Ministrus Interiór CPLP nian, hodi deskute kona-ba lasu amizade no kooperasaun di’ak hirak ne’ebé alkansa tiha ona, inklui kestaun hirak ne’ebe pertenente iha área polísia, migrasaun no área protesaun sivíl no bombeiru,” informa  Alexandrinho ba jornalista sira hafoin fila hosi vizita serbisu ba Portugal no Cabo-Verde iha Aeruportu Internasionál Prezidente Nicolau Lobato Comoro, Dili, tersa (07/05).

Nia dehan, enkontru kooperasaun entre nasaun CPLP atu identifika no rezolve problema hirak ne’ebé kada nasaun sira infrenta hetan solusaun liuhusi serbisu hamutuk.

Sekretáriu Estadu ne’e hato’o agradese ba nasaun rua ninia apoiu hodi fó formasaun no koñesimentu ba rekursu timoroan atu dezenvolve serbisu di’ak liu-tan ba futuru.

Alexandrinho relata mós katak, dadaun ne’e, nasaun membru CPLP sira bolu no buka malu hodi reforsa liu-tan kooperasaun iha ámbitu polísia ninian, fahe mós responsabilidade hosi nasaun membru, karik iha kazu emerjénsia ruma hosi nasaun membru no atu fahe informasaun ba malu entre nasaun membru sira.

Tuir planu, iha tempu besik, Sekretáriu Estadu ne’e sei hakerek karta ba Autoridade Protesaun Sivíl Portugal nian hodi ko’alia kona-ba área saida maka Portugal atu fó iha futuru.

Jornalista : Eugénio Pereira | Editór: Xisto Freitas

Imajen: Sekretáriu Estadu Protesaun Sivíl, Alexandrinho Xavier Araújo. Foto Mídia Minist’eriu Interiór