CNRT Konsidera Órgaun Estadu Haat Seidauk Hamriik Metin

Timor Post (10/08/2020) -- Vise Xefe Bankada CNRT, Patrocínio Fernandes dos Reis, haree katak órgaun soberanu 4 (Prezidénsia, Parlamentu, Governu no Tribunal) to’o ohin loron seidauk bele hamriik metin tanba sempre hasoru hela dezafiu oi-oin atu próteze maturidade polítika.

“Timor-Leste sei nafatin iha konstrusaun estadu tanba haree katak ita nia ai-riin haat nasaun nian to’o ohin loron seidauk bele hamrik metin, sempre hasoru hela dezafiu oi-oin atu próteze maturidade ita ninia kedewasaan politik kenegaraan”, hatete Patrocínio iha Parlamentu Nasionál, Segunda (10/08).

Deputadu ne’e adianta lider polítiku sira ohin loron hala’o de’it jogu polítika ba podér, ambiente ida ne’e bainhira kompara ho nasaun avansadu sira seluk iha mundu, ne’e la’ós tama ona ba iha faze aprendizajen.

Tuir nia tanba lider polítika jerasaun foin sa’e sira foin sa’e sira foin tama iha faze ida aprendizajen oinsá atu ita bele tama iha ambiente ida hodi ukun nasaun ida hetan podér tuir regra konstituisaun nian.

Iha parte seluk Deputada Bankada Fretilín, Josefa Soares, hatete iha diferensa hanoin relasiona ho observasaun sidadaun sira katak Partidu Polítika sira halo kompetisaun so hanoin ba iha interese ba an rasik.

“Ne’e perspetiva ema hotu ninian maibé Partidu Polítika ida ne’ebé sa’e ba iha podér ne’e, aktu atu bele jere nasaun ida ne’e di’ak ba povu, jere ho rekursu nasaun nian”, dehan Josefa.

Jornalista: Julio Salinas Soares