quinta-feira, 13 de maio de 2021

Governu kontrata otél ba izolamentu ho kustu diferente

DILI, 12 maiu 2021 (TATOLI) - Otél-sira ne'ebé oras ne'e daudaun Governu liu hosi Ministériu Saúde (MS), kontrata ba fatin izolamentu, ho kustu ne'ebé la hanesan, bazeia kondisaun no tuir padraun presu ne ' ebé kada otél estabelese.

“Kontratu fatin ba izolamentu, depende ba ema nia presu kada loron. Iha balun ho presu $ 30, balun $ 40, balun $ 45, balun $ 50 não balun $ 70, ”Diretór Jerál Serbisu Kooperativu, MS, Marcelo Amaral, hateten ba jornalista-sira iha, MS, Caicoli, Kuarta ne'e.

Marcelo Amaral fó ezemplu katak, otél Eternity ninia presu $ 20 kada kama, maibé MS negosia bele hatún ba $ 17,50 centavu kada loron, enkuantu otél Time Square, kama ida ho presu $ 50 kada loron ba ema ida.

Tuir kalkulasaun MS, loron ida sura kama ida de'it $ 30, bainhira iha otél ida mak iha kama 100, konta ba loron 14, kustu bele to'o $ 42.000.

“Hosi presu ne’ebé iha, MS bele gasta rihun $800 to’o rihun $100 kada fulan. Hanesan iha otél Eternity ne’ebé iha kama 200, ita gasta rihun $100 kada fulan, bainhira kama sira-ne’e prienxe hotu,” nia esplika.

Diretór Jerál ne’e mós subliña katak, bainhira hakarak atu redúz gastu, di’ak-liu tenke promove auto-izolamentu ne’ebé konsidera efetivu-liu.

Tanba ne’e, nia dehan, MS presija atu halo diskusaun hodi halo sensibilizasaun ne’ebé efetivu liu tan, nune’e família ne’ebé kondisaun uma di’ak, no ladún di’ak mós bele izola de’it iha uma-rasik.

“Ita bele halo auto-izolamentu atu bele redúz kustu-sira no despeza. Maibé, kestaun maka, komuniddae koopera ka la’e.

Tanba ne’e, Governu tenke buka mekanizmu atu apoia ema-sira ne’ebé laiha kapasidade ekonomia, nune’e bele sustenta moris durante auto-izolamentu,’’ nia subliña.

Izolamentu ne’ebé oras ne’e ativu hela mak hanesan Vera Cruz, atiga Ospitál doutór António Carvalho Lahane, Novo Horizonte, Tasi-tolu iha haat kompostu hosi block A, B, C, no lona, otél Leo-Kase, SK hotel, Fortuna hotel, Palásiu Nobre Lahane, otél Vila-Verde, otél Eternity no Golgota Mall ne’ebé sei uza iha tempu badak.

Kona-bá edifísiu eskola Xina iha Bairru Formoza no mós edifísiu Eskola Téknika Vokasionál (STM sígla indonézia) Becora, sei iha prosesu levantamentu, bainhira kompleta ona MS sei halo reabiliatasaun koordena ho Ministériu Edukasaun Joventude no Desportu (MEJD).

Jornalista: Felicidade Ximenes | Editór: Cipriano Colo

Sem comentários: